Tunkar October ni 21-23 chhunga neih Lunglei District Rajiv Gandhi Khel Abhiyan (RGKA) Sports 2014-2015 chu vawiin chawhnu dar 3:00 khan a kharna inkhawm SAI Extension Centre, Lunglei-ah neih a ni a, Lunglei SDC Pu C.Lalzuiliana, MCS-in he hun hi hmanpuiin lawmman a sem nghal a ni.

RGKA Sports kharna inkhawm LDSC Chairman Pu K.Lalawmpuia kaihhruaiah Pu C.Lalzuiliana chuan hun chep tak karah RGKA Sports Meet hlawhtling taka buatsaih a nih theih chu a lawmawm hle a ni, a ti a. Infiamna hi zirna peng pawimawh tak pakhat a ni a, taksa bakah rilru hrisel min siamsaktu a ni, a ti. Infiamna lama naupangte tana hamthatna hrang hrang ngaihtuah sak thintu sorkar kan nei hi lawmna chang hria a, theihtawp chhuah zel turin infiammi lo kal khawmte a chah a ni.

RGKA hnuaiah hian inelna chi hnih a awm a - 1). Swami Vivekananda RGKA District level Rural Sports Competition 2014-2015 leh 2). Swami Vivekananda RGKA Women Sports Competition 2014-2015 te a ni. A hmasa zawkah hian infiammi mipa leh hmeichhia kum 16 hnuai lam ten sports discipline 10 (judo, taekwondo, boxing, wrestling, weightlifting, badminton, table tennis, athletics, football & hockey) ah an intihsiak a; a pahnihna zawkah hian hmeichhia kum 25 hnuailam ten sports discipline 7 (badminton, table tennis, tennis, volleyball, basketball, athletics & hockey) ah an intihsiak thung a ni.

Lunglei District RGKA Sports 2014-2015 ah hian RD Block 3 - Lunglei, Lungsen leh Bunghmun RD Block - atangin infiammi 250 chuang an tel thei a. Over-all Champion chu Lunglei RD Block Team niin Runners-Up lawmman latu chu Lungsen RD Block a ni. District RGKA Sports discipline hrang hranga lawmman pakhatna late chu Aizawl-a November ni 3, 2014 atanga tan tur State Level RGKA Sports Meet-ah Lunglei District aiawhin an chhuak dawn a ni.