Nimin chawhnu khan Pu Lal Thanzara, Parliamentary Secretary to Chief Minister chuan Mission Foundation Movement (MFM) hnuaia awm MFM School of Nursing (Auxiliary Nurse Midwifery) Batch 4-na te ‘Capping and Lighting Ceremony -2012’ programme, MFM Hall, MFM School of Nursing, Ngama Building, Bawngkawn-ah a hmanpui.
Pu Lal Thanzara chuan nurse te hna - damlo enkawl leh bawihsawm chu hna khirh tak leh ropui tak anih thu sawiin nunna hlu tak, tumahin kan siamchhuah theih loh leh kan pek ve ngawt theih loh chu nurse te kutah hian thui tak a innghat a ni, a ti a. Nurse hna thawk turin nasa taka inpuahchah a, taimakna leh inpekna tak tak nen thawh a ngaih avangin nurse hna chu a nazawnga tih chi a ni loh thu a sawi lang bawk a. Pu Lal Thanzara chuan doctor leh nurse te chuan an hun tam zawk damlo te enkawl nan an hman thin avangin leh rilru hahna, beidawnna leh thihna kara thawk reng an nih avangten taksa hriselna an neih piah bakah rilru leh thlarau lamah pawh hriselna tha leh chakna an mamawh reng thu a sawi a ni.
Pu Lal Thanzara chuan nurse hna hi Kristian hmasa te lo tihchhuah a ni, tiin a zirchhuak te chu Lal Isua hnungzuitu leh rawngbawltu pawimawh tak an nih thu a sawi lang a. Lal Isua hna chhunzawmtu pawimawh tak an ni tih hre reng chunga Lal rawngbawl chu engtik lai maha theihnghilh lo turin a chah bawk a. Mizo Nurse te chu India ram mai bakah, khawvel hmun hrang hranga damdawiin leh ramthar rawngbawlna atan miin an duh em avanga ngaihsan an hlawh chu a ropui a ni tiin Mizo hnam an tih hmingthat thu a sawi a ni.
Programme ah hian Upa R. Vanlalzauva, Director MFM Nursing School chuan Nursing School din chho anih dan chanchin tlangpui sawiin Pi R. Zirthangi, Principal chuan School Report a pe a. Pi Lalremmawi, Nursing Superintendent, Civil Hospital, Aizawl chuan Batch 4-na nurse zirlai 20 te chu nurse te lukhum tirna hun ‘Capping & Lighting Ceremony’ a hmang bawk a ni.
MFM School of Nursing (ANW), Health Worker zirna school hi 2009 khan Chief Minister Pu Lal Thanhawla puihna in din a ni a. He School atang hian ANW zirchhuak mi 33 an awm tawh in, tunah hian ANM course hi Batch 3-na leh Batch-4 na zirlai 44 in an zir mek a. MFM hi 2002 khan din a ni a, Pre-Service Missionary Training te bakah pa khawi (mushroom cultivation) leh leafplate, paperbag leh handicrafts siamna te an kalpui mek bawk a ni.
