Chhiatna lian tham kangmei, lirnghing, leimin leh thli chhia laka chetlak dan leh inven lawk dan chungchang Aizawl District huap tana workshop buatsaih chu vawiin khan I & PR Conference Hall-ah neih a ni.
He workshop hi sorkar laipui leh UNDP bultuma huaihawt niin mihringte tana chhiatna hrang hrang thlen thulha chetlak dan tur inzirtirna leh inven lawkna hrang hrang ngaihthlaka sawiho a ni a. Workshop tobul leh buatsaih a nih dan tlangpui Pu Rothuama, SDO (S) DC Office Aizawl in a sawifiah a, workshop hi DC office a Disaster lam changtu Nodal officer Dr. Lalngura Tlau in a kaihruai a ni.
Vawiin workshop ah hian Aizawl District pum chhiatna hrang hrang laka hmalak dan chungchang Pu Zothansanga Hmar, District Organiser in a hrilhfiah a, Pu Vanlaltanpuia, Asst. Jailer, District Jail, Lawngtlai chuan hmasawnna hna hrang hrang thawh mekah chhiatna thlen theih dan leh a pumpelh dan a sawi a. Him zawka mihring chenna tur In leh Lo ruahman dan chungchang Er. Lalbiakzuala, Associate Professor, DM Cell, ATI in a sawi thung.
Vawiina workshop chhimtu department hrang hrang aiawhte hian sawihona hun leh ngaihdan inhrilh tawnna hun tha tak an hmang a ni.
