Nimin khan Kanchanpur Dak Bangla-ah Mizoram Sorkar Officials leh Tripura Officials leh MBDPF (Mizoram Bru Displaced Peoples Forum) hruaitute chuan Repatriation Road Map Ministry of Home Affairs in a lo pawm tawh chungchangah Coordination meeting neih a ni.

Meetingah hian Relief Camp ah Reang (Bru) hruai kir turte hi endik hna thawh phawt tura ruahmanna awmsa chu pawm tlan a ni a, camp hrang hrang parukah te hian Mizoram atanga Identification team te hian zing dar 9:30 tangin endik hna hi an thawk thin dawn a ni. Sorkar Officials pahnihte hian Repatriation chungchanga thil hriat tur pawimawh leh Inteligence thilah in pawh taka information in hrilh hre thin turin leh lungrual taka thawhho tum a nih thu meetingah hian tarlan a ni. Mizoram atanga official duty te venhimna lamah Govt of Tripura chu buaipui tura rel a ni.

Reang (Bru) Relief Camp a awmte hi E/Roll 1995 hmanga endik tur a ni a, Roll a hming chuang lo te chu thuang hnihna ah endik an nih dawn thu leh Repatriation tanpuina dawng tawh te tan a dawn nawn theih dawn loh thu meeting-ah hian tarlan a ni bawk.

Endik hna zawh a nih hnu hian hruaikir hna hi November thla tawp lamah thawh tura ruahman a ni a. Hetih rual hian MBDPF hruaitute chuan hruaikir an nih hma hian an thil phut hrang hrangte tihhlawhtlin sak an phut thu meetingah hian an tarlang a, Sorkar Officials te chuan Ministry of Home Affairs (MHA) thuchhuak leh Road Map anga Repatriation hi kalpui an nih avangin an thuneihna ngaihchan a ngaihthu leh an harsatna erawh lo thlensak an tum thu an sawi.

He meeting-ah hian Mizoram Officials aiawhin Pu Lalbiakzama Addl Secretary (Home), Pi Lalbiaksangi D.C Mamit, Pu H. Lianzela Addl D.C Mamit, Pu R. Lalremsanga, Addl D.C Kolasib, Pu J.H Lalrimawia Addl D.C Lunglei, Pu Paul Rokima, DIPRO Mamit leh Pu Lalrinawma Khiangte SDC Kolasib te an tel a ni.

Tripura Sorkar Officials atangin North Tripura District Magistrate leh Panisagar leh Kanchanpur SDM bakah MBDPF President Pu A. Sawibunga, Bruno Marsha leh Pu R. Laldawngliana te an tel a ni.