October thla hi khawvel pumah hnute cancer chungchang inhrilhhriatna International Breast Cancer Awareness month a nih angin nizan khan Mizo NIFTIANS Association buatsaih cancer awareness programme chu Mizoram University Multipurpose Hall ah neih a ni a. Health Minister Pu Lal Thanzara chu khuallian a ni.

Khuallian Pu Lal Thanzara chuan khawvel pumah leh Mizoram chhungah ngei pawh hnute cancer a hluar em em a, he natna tihbaiawm tak hmachhawn dan leh a natna chungchang inzirtirna programme buatsaih a ni chu lawmawm a tih thu a sawi.

International Breast Cancer Awareness month puala programme buatsaihah hian India ram hmun hrang hranga National Institute of Fashion Technology (NIFT) atanga zir chhuak Mizo designer ten an thawmhnaw an pho chhuak a. Model te hi State dang atanga rawn tel te pawh an awm a ni.

Dr Eric Zomawia leh Dr Saia Chenkual ten breast cancer chungchang presentation an nei a. He programme senso hi Mizoram State Cancer Institute leh National Programme for Prevention and Control of Cancer, Diabetes, Cardiovascular Disease and Stroke (NPCDCS) ten an tum a ni.