Lok Sabha MP Pu C.L. Ruala’n Model Village-a a thlan, Haulawng hawnna inkhawm chu vawiin chawhma khan Hausiampa Hall-ah neih a ni a. Pu C.L. Ruala chu Khuallian niin, bialtu MLA Pu P.C. Lalthanliana chu Khualzahawm a ni.

Pu C.L. Ruala chuan Haulawng khua chu khaw inlungrual, VC tangrual leh hnathawk thei a nih angin, midangte tana entawn tlak ni tura a duh thu a sawi a. Model village atan sum hranpa dah a nih loh avangin a hming mai a nilawmni tih a awl khawp a, India hnampa Mahatma Gandhi khan khaw hrisel, thianghlim leh intodelh a mithhla thin a, chutiang khua chu siam kan tum a ni, a ti. Neitu rilru pua hna kan thawh loh chuan, kan hnathawhnaah te hlawhfa anga in ngaihna a piang a, kan hnathawh te a dawrawm thin a ti a. Hemi ti hlawhtling tur hian kan rilru kan buatsaih hmasak a tul in, ram nuam zawk kan siam thei dawn a ni, a ti. Khuallian hian tui dah khawlna tur siam nan cheng nuai 15 a pe nghal a ni.

Pu P.C. Lalthanliana pawhin Haulawng khua Model Village-a thlan a ni chu lawmawm a tih rualin pawl rilru kan tihbo a, kan zavaia tan a ni tih hriat tha a tih thu a sawi a. Sawrkarin a tih tur a tih bakah mipui leh khawtlang in faina leh thianghlim kawngah theih ang tawka hma kan lak ve a tul a ni, a ti. Khualzahawm hian Haulawng khua a hmasawnna ruhrel hrang hrang siam mek te a tarlang nghal a ni.

Pu Joseph H. Lalramsanga, Project Director, DRDA Lunglei leh Charge Officer ni bawk chuan inkhawmna hi kaihruaiin, Haulawng khua tana SAGY hnuaia hmalakna te a tarlang a. Haulawng VCP Pu K.H. Tialthanga’n Haulawng khaw chanchin tarlangin, Haulawng Village Day-ah October 21 a puang nghal a ni.

Pu J. Rothanga, DAO, Lunglei chuan Rainfed Area Development (RAD) hnuaia tanpuina chhungkaw 45-te hnenah cheng nuai 16 hu vawk, ar, sangha dil, khuai khawina leh tuikhuah siamna tur a sem a. Pi Helen Zomuanthangi, APO (M), DRDA Lunglei chuan intiamkamna kaihruaiin, Lunglei BDO Dr. Malsawmtluanga Fanchun in lawmthu sawina in hun a khar a ni.

He hawnna inkhawm neih zawh hian Lunglei District-a Health and Family Welfare department bultumin Govt. Middle School-ah Free Medical Camp buatsaih a ni a, mi 400 chuangin doctor rual an in entir a. Thisen test-na te siam a nih bakah damlo te tan a thlawna damdawi sem nghal a ni bawk.