Serchhip District MJA leh Serchhip District NLUP Nodal Officer tangrualin vawiin chawhma dar 11:00 khan Serchhip Hmar Veng YMA Hall-ah NLUP a lo hlawhtlin lehzual theihna atan NLUP Awareness Campaign “Talk Show” an buatsaih a, NLUP Line Department hrang hrang hotute telin inkawmhona hun hlimawm leh hlawk thlak tak an hmang ho a ni.

Vawiin a NLUP chungchang sawihona hi District NLUP Nodal Officer, Pu Lawmkima, MCS chuan telpuiin sawihawnna hun a hmang a, Serchhip District chu “NLUP Pa” Mizoram Chief Minister ni bawk Pu Lal Thanhawla Bial awmna anih vangin midangte entawntlak taka thawk chhunzawm zel tur an nih thu leh tan lak sauh sauh a tul thu a sawi a, Line Department hrang hranga official te thawhrimna leh thahnemngaihna bakah an zavaia zinga thawhhona tha an neih avanga tluang tak leh harsatna awmlova hmasawn zel thei an nih thu a sawi a, remchang hre tak maia hetiang sawihona an buatsaih avangin District MJA te lawmthu hrilhin NLUP hlawhtlin na atana thawh hona tha an neih zel a duh thu a sawi bawk a ni.

Pu Kapliana Pachuau, Serchhip District MJA President pawhin thu sawiin hmun thenkhatah chuan media hnaih ngam vaklo officer an awm thin thu sawi a nih laia Serchhip District-a Media te leh Sawrkar hnathawkte thawhhona tha tak a awm chu lawmawm a tih thu a sawi a; NLUP chungchanga hma an lakna apiangah an tel ve a remna chi anih chuan engtiklai pawha thawhpui an inhuam reng thu a sawi a, kan thawhhona a that phawt chuan NLUP hi kan hlawhtlinpui ngei ngei ka ring a ni a ti bawk.

Vawiin sawihona hun hi District NLUP Media Officer, DIPRO ni bawk Pu Andrew H. Lalremruata, MIS chuan moderator ah tangin a kaihruai a, NLUP Line Department pariat aiawh ten an hmalakna leh an thlen chin bakah harsatna an tawh theuh te an sawi zawh ah MJA member te hnen atanga mipui tana tangkai tur thil pawimawh chi hrang hrang zawhna an dawn chu an chhang nghal a, boruak tha leh hlimawm tak zalen takin an hmang a ni.

Serchhip District MJA te hian vawiina NLUP Talk Show hi a copy siamin District chhung khawtinah mipuite en turin an thawndarh dawn a ni.

Attachment

  • Loading attachment...