Vawiin chawhma dar 10:30AM khan Siaha District Bawrhsap Pi Harleen kaur IAS, chuan Siaha(ST)  Constituency hnuaia Model Village Tisopi khua a tlawh a. IDBI ( Industrial Development Bank of India)  ten an CSR( Corporate Social Responsibilities)  Fund atanga Siaha District School 223 hnena pek tur Water Filter 5 chu a hmasa ber atan Tisopi khuaa Primary School 3 leh Anganwadi 2 te hnenah a sem. 

Pi Harleen-i hian Tisopi khuaa Women Self Help Group ten an din Turmeric Processing Unit te, Anganwadi te, School leh Aieng chinna hmun leh sawrkar hmalakna hrang hrang te a tlawh nghal a. Amah lawmna puala inkhawm buatsaihah hian thu sawiin, Pi Harleen-i chuan Siaha District-a Bank hrang hrang awm ten  CSR Fund hmanga mipui vantlang rawngbawl hnah an thawh thin chu lawmawm a tih thu a sawi a. A bik takin kum khat awrh chauh va upa IDBI  in an CSR Fund an hmandan-ah a lungawi thlak hle a ni, a ti. IDBI  hian a vawikhat nan an CSR Fund atangin  Zyhno khuaa TT Mara Chako & Abraham Charitable Trust  te hnenah  Vohbik te awmna Home sak nan cheng nuai Rs.30/- sanctioned in, tunah hian cheng nuai Rs.12/- an released fel tawh a ni. A thawh hnih nan MADC hnuaia Primary leh Middle School awm zawng zawng School 223 te hnena pek tur Water Filter 223 an lei leh bawk. 

Pi Hmangaihsangi Khenglawt, Executive Assistant, IDBI chuan thu sawiin, kan District Bawrhsap Pi Harleen kaur IAS, thahnem ngaihna avang liau liau va, kum khat chhung leka hetianga CSR Fund hmang tangkai thei hi kan ni, a ti. 

 Vawiina  Pi Harleen Kaur IAS, in Model village Tisopi khua  a tlawhna-ah hian Pu N.Chakhai, Addl.DC, Pu N.Vabeiratlua, I&PRO, Pu S.Kaptluanga, BDO Siaha RD Block, Pu Vanlalvuana Rokhum, ADHO, Pi Hepaw Hlychho Circle Officer, Pu Jessie Lalchhuanawma, Coordinator Horticulture  Dept leh Pi Galilee Technical Expert ,DRDA te leh Pi Hmangaihsangi, Executive Assistant, IDBI ten an tawiawm a ni.