Vawiin khan Chhimveng YMA Hall, Mamitah Mizoram Upa Pawl, Sub-Headquarters Mamit District chuan Assembly Vawi 6-Na hman a ni a, Pu H.Lianzela, Addl DC Mamit chu khuallian niin Pu H.Lallawmkima Advocate, District Court Mamit chu khualzahawm a ni.

Khuallian chuan thu sawiin mihringte kan lo pianchhuahin kan duh ber chu dam rei a ni thin a, upat hi natna a ni lova, a man a tam em em a ni. Kum naupang te te a  mual liam tam tak an awmlaia MUP Member ni theia kum tam tak an dam chu lawmthusawi tur an nih thu sawiin Upate chu dai hriat ngah tawh an nih avangin mi fing an ni a, tuna finna leh thiamna tam tak kan ramin a neih hi upate min hnutchhiah a ni a ti a. Kalkhawmte chu hmathlir nei reng tur leh Mamit District hmasawnna hnarkaitu ni turin a sawm bawk.

Khualzahawm pawhin Legal Service Authority hmalakna hrang hrang a sawi bakah upate chu dan hriatna kawnga hmasawn zel turin a fuih a. Court-a kal hreh lova, dan hnuaia an chanvo awm theite ngaihven turin a chah.

Mizoram Upa Pawl Sub-Headquarters Mamit District Assembly Vawi 6-Na hi Pu Z.Sangliana, President MUP Sub-Hqrs chuan kaihruaiin kum 2016-17 chhunga MUP Member chatuan ram panta mi 70-te sunna hun hman a ni bawk.

MUP Sub-Hqrs Mamit District huam chhungah hian Area 9 awmin Unit 60 a awm a. Assembly hmang tur hian Mamit District chhunga khaw hrang hrang atangin MUP Member thahnem tak an kal khawm a, 2017-18 chhunga an hruaitu turte thlanna neih nghal a ni.