Pu Lalrinmawia Ralte, Parliamentary Secretary, Home, RD, etc. Mizoram chuan Tripura Gospel Centenary, ni 23 - 25 November, 2011 chhunga Vanghmun a buatsaih chu hmanpuiin chibai bukna a hlan.
He hun ni 24 November, 2011 a Cultural and Variety Programme hmanna hunah Chibai bukna thuchah sawiin, Pu Lalrinmawia Ralte chuan Chanchintha thlen kum 100-na tluang taka thleng theia min siamtu Pathian hnenah lawmthu sawiin he hun hmangtu zawng zawngte chibai a buk a. Chanchintha kan dawn atanga kum 100-na kan hman mekah hian duh tawk mai lova nasa lehzuala tan kan lak a tulzia tarlangin tun dinhmunah State chhungah pawh Kristian 3 percent vel chauh kan nih avangin hmalakna tur a la tam hle a ni a ti a. Chanchintha rawn thlentute ramah chanchintha hrilh a tul tawh thu sawiin hmalam pana ke pen sauh sauh turin Centenary hmangtu zawng zawng te a sawm bawk a ni. Pu Lalrinmawia Ralte, Parliamentary Secretary, Home, etc. Mizoram chuan Tripura Gospel Centenary Souvenir a tlangzarh a ni.
Raja Hrangvunga Mizoram a Bunghmun khaw lal chu Tripura Phuldungsei ah kum 1911 ah pem lutin hetah hian Kristian 40 an awm a, hei hi Tripura Kristianna a luh tanna a ni.
Tripura Gospel Centenary lawmna hunah hian hnam lam chi hrang hrang entir a niin hmun hrang hrang atangin mi thahnem takin he Tripura Gospel Centenary hi an chhim a ni.
