Falkawn Synod Social Front buatsaihin vawiin chawhma dar 11 khan an Sunday School Hall-ah NLUP kalpui dana infuihna hun hman a ni a, Pu R. Selthuama, Chairman, NLUP Implementing Board-in a hmanpuiin Aizawl atangin official ten an tawiawm.

Pu R. Selthuama chuan rinawmna leh taimakna tello chuan NLUP sum dawngtute chu an hlawhtling lovang, NLUP hmasa ah pawh mi tam tak anih dan tur nilova an sum dawn hmang tute an hlawh chham a, taimakna leh rinawmna nen a thawkte chu an ding chhuak a, vawiin ni ah mi awhawm tak dinhmunah an ding a ni a ti.

UT tirh atangin sorkar hrang hrangin kuthnathawktu rahbi tleu tawhte khai chhuah nan hma an la thin a, PC sorkarin, Garden Colony, MNF in Pu Denga hunah Jhum control leh a hnuah MIP te an buatsaih mahse, a kalphung fuh loh avangin an beidawng, Congress sorkar NLUP hmasa ah mi tam tak ding chhuak an awm a, tiin tuna mumal leh sum pawh tam tham a an kalpui leh mekah a hlawhtlin ngei theih nana, kohhran meuhvin fuihna thu sawi tura an sawm chu lawmawm a tih takmeuh thu Pu Selthuama chuan a sawi.

NLUP kan dawn hian lawm nachang i hria ang u, mi a lawm chuan a tihtur a beisei ang theihtawpin a bei thin tiin Pu Selthuama chuan kalkhawmte a hrilh a, mi thenkhatin\" NLUP an sem zawm thei tawhlo, sum an neilo tih velah lo buai suh u. Central sorkarin min pe a, min pe zel dawn, kan sem anga kan sem zel ang, mahse, lawmna chang hria in, rinawmna leh taimakna nen hlawhtlin theuh i tum ang u\' tiin kalkhawmte a ngen a ni.

Pu Zorammuana, Secretary, NLUP Implementing Board pawhin thu tawi sawiin, kan nihna kan hriat chian a ngai tiin, Minister, Officer leh mi hausa kan nih loh avangin sorkarin min tundin nan NLUP sum min pek hian, hei chauh hi rinawm tak leh taima takin kan thawh chuan kan chhungkua kan ding chhuak ve thei, thil dang tih theih ka neilo kan tu leh fate mi pangngai ah an lo chhuah ve nan tan ka lak a ngaia tih i hre thar leh ang u, tiin mipui kalkhawmte a fuih.

Vawiin Synod Social Front, Falkawn NLUP dawngtute fuihna inkhawm buatsaih hi Upa Darkhuma\'n a kaihruai a, chawhnu lamah zawhna leh chhanna bakah kalphung tha zawk inzirtirna hun an hmang nghal a ni. He hun pawimawh tak Falkawn Synod Social Front ten an buatsaih chhan hi dik tak leh fel taka NLUP sum an khaw miten an hman an duh vanga buatsaih an ni tih inkhawm kaihruaitu hian a sawi.