Mizoram sorkar nena thawh hona tur kawng dapa lo zin UN Mission Team te chuan vawiin khan Aizawl an chhuahsan leh ta a. An kal hma in NLUP Implementing Board Vice Chairman Pu P.L.Thanga leh sorkar department hotu ten nen Aijal Club conference hall ah nimin lama meeting chhunzawmna leh tlangkawmna atan sawihona meeting an nei.
United Nations Organisation thil tum pawimawh tak tak, leilung leh a chhehvel boruak venhim leh hengte hi tichhe lova leilung leh ramngaw hausakna hman tangkai te, ei leh bar dehchhuah tihpun leh mihring khawsakna chawikan te, kut hnathawktu te tana eizawnna him leh ngelnghet siamsak te, tuihna kangchat mek siam thar leh humhalh te, natna hrileng laka ranvulh te an himna tur te hi Mizoram sorkar flagship programme NLUP thil tum nena thuhmun a nih avang leh heng te hi UN Agency lo kalte hian a hrang theuhva an hmalakna mek a nih bawk avangin hemi kawnga Mizoram sorkar nen thawh hona tur kawng hi UN Agency 4 te hian an rawn enfiah a. Hmalakna tura “potential area” te chu department hrang hrang te leh NGO te, Mau sawngbawlna lam buaipuitute nen nimin atang khan an sawi ho a ni.
India rama UN Agency hrang hrang te hian hmarchhak state thenkhatah agency mal anga hmalakna an nei nual tawh a. Tun tum hi India rama UN Agency 27 aiawha UN Mission anga hmalakna hmasa ber leh la awm chhun tur a ni a. Hemi atana UN Mission Team hmahruaite hi Agency lian 5 a hotu lawkte an ni nghe nghe a ni. Mizorama UN Mission bul rawn tanna turin UN Team te hian February thla chhungin ruahmanna an siam dawn a. Ruahmanna an siamte chu March thla laihawlah Mizoram sorkar aiawhte nen thlir ho tur a ni ang.
UN Team te hian an haw pahin Sairang a Venus Bamboo Processing Plant an tlawh nghal bawk a ni.
