New Delhi-a cham mek School Education, Industries leh Geology & Mineral Resources Minister Pu H. Rohluna leh amah tawiawmtu Pu Joseph Lalhimpuia, Parliamentary Secretary te chuan nimin (Zirtawpni) khan Pu B.N.Talukdar, Director General, Directorate General of Hydrocarbons, Ministry of Petroleum & Natural Gas hmuin, Mizoram a Gas leh Oil zawn hna kalpui mek chu chak tak a kalpui turin an hrilh. He hna thawk mektu Oil and Natural Gas Commission (ONGC) leh Oil India Limited (OIL) ten Minimum Work Programme ang a hma la tawklo ni a a hriat thu Minister hian sawiin, chak zawk a hma la tur a nawr turin Director General hi a ngen a ni.

Pu B.N.Talukdar DG pawhin gas leh oil zawnchhuahna kawngah Mizoram Sawrkar leh mipuiin an tawiawm tha hle tih sawiin, lawmthu a lo hrilh a, Mizoram chhungah Gas leh Oil tam tham tak laichhuak turin beiseina lian tak an nei tih sawiin, chak zawk a hna thawh anih theih nan theihtawp alo chhuah tur thu Minister hi hrilh bawk. Pu Joseph Lalhimpuia, Parliamentary Secretary pawhin leihnuai hausakna zawnchhuah leh hman tangkai thuai hi Mizoram Sawrkarin a ngai pawimawh hle a ni tih a sawi a, Minister nen hun hmasa berah Central sawrkar an dawr ani tih a sawi bawk.

Nimin vek khan Minister hian Dr. Sanjeev Ranjan, IAS, Secretary, Border Roads Development Board (BRDB) pawh bia in Seling - Keifang kawng laih zau nan a OIL-in Rs. 6.37 crores PCDA hnenah Border Roads Organization hnathawhna tur a October 2013 a pek daih tawh tun thleng a thawh ala nih loh thu leh hei hian Mizoram a Gas leh Oil zawn leh laihchhuahna kawngah harsatna a siam thu sawiin, a rang thei ang a hma laksak turin a hrilh a, Dr. Sanjeev Ranjan chuan hma alo lak nghal tur thu alo hrilh bawk a ni.

Minister leh Parliamentary Secretary te hian Delhi an cham chhung in Central Minister leh sawrkar mi pawimawh hrang hrangte an la hmu dawn ani.