DIRECTORATE OF INFORMATION & PUBLIC RELATIONS, Government of Mizoram, India

No.2597/2020-2020

Chairman, State Executive Committee, Mizoram State Disaster Management Authority, Pu Lalnunmawia Chuaungo, Mizoram Chief Chief Secretary ni bawk chuan Section 22(2)(h) &24(l) of the Disaster Management Act, 2005 in thuhneihna a pek angin 1.7.2020 atanga 31.7.2020 inkara Mizoram chhunga partial lockdown inkaihhruaina kalpui dan tur thupek a ti chhuak

Mizoram Sawrkarin 25.03.2020 atanga Lockdown a kalpui chu mimal eizawnna leh mipuite harsatna sutkianna atan, 01.07.2020 atang hian thlahdul deuh remtih a ni a. Amaherawhchu, COVID-19 hrileng mekin India ram hmun hrang hrangah kian lam a la pan mai loh avangin inkhuahkhirhna thenkhat erawh kalpui tur tih a ni.

Chuvangin, a hnuaia tartan inkaihhruaina te hi 01.07.2020 atanga 31.07.2020 thleng hman tur atan siam a ni. Hei hian a hma-a Lockdown kaihhruaina alo siam tawh te a thlak (supercede) ang.

1. MIZORAM PUMA INKHUAHKHIRHNA KALPUI TUR TE

A. International & Inter-State Border

1. Mizoram luhchhuahna international border leh inter-state border khar mekte chu khar chhunzawm a ni ang.

2. Lengpui airport chu hawn chhunzawm a ni ang a, thlawhnaa Mizoram lo lut tur reng reng chuan mCOVID-19 mobile application-a mPASS-Flight ah Mizorarn pana an lo chhuah hma-in an in register lawk tur a ni.

3. Bairabi, Vairengte leh Kanhmun kaltlang kawngpuite erawh chu Mizoram-a hman tur bungraw phurlut leh Mizoram-a thar leh siam bungrua phur chhuak lirtheite tan hawn a ni ang.

4. Mizorarna lo lut tur zin veivahna lirthei erawh chu Home Department phalna nei chauh kal phal a ni ang.

5. Mizoram atanga chhuak tur zin veivahna lirthei erawh chu an awmna Deputy Commissioner te phalna la in an chhuak thei ang.

B. Mizorama lo lut tur screening leh quarantine chungchang

1. Mizoram pawn atanga lo lut tur reng reng chu quarantine tur an ni

a. Quarantine dan tur fel taka ruahman a nih theih nan Mizoram Sawrkar phalna an la hmasa tur a ni.

2. Phalna neia Mizoram-a lo lut reng reng chu entry point-ah uluk taka screening kalpui chhunzawm zel a ni ang. Mizoram mi leh sa, lockdown avanga State pawna tangkhangte lo kir leh dan tur ruahhmanna chu 15.05.2020 a chhuah, COVID-19 Lockdown avanga Mizoram mi leh sa, Mizoram pawna tangkhangte lo haw dan tur kaihhruaina siamthat (Revised Standard Operating Procedure), in a sawi angin kalpui a ni ang.

3. Mizorarn-a lo lut te quarantine dan tur chu Health & Family Welfare Department in kaihhruaina a siam anga kalpui a ni ang.

4. Driver leh handyman te, Mizoram pawn atanga bungrua la-a zin te chu Sawrkar quarantine facility-ah an khawsa ang a, bungraw lak hna an thawh chhung chu midang nen intlawhpawh lovin quarantine facility atangin an thawk ang a, load an lak hnuhnun ber atanga ni 14 hnu-ah an in lama haw phalsak an ni ang. Quarantine facility-a an awm chhung hian an chhungte leh midang tlawhpawh phalsak an ni lovang. Aarogya Setu-ah in-register vek tur a ni.

5. State pawn lam lirthei driver leh handyman, phai atanga bungrua rawn thiar lut thinte chu an kalphung pangngai angin khaw dai hmun remchangah anmahniin eirawng an inbawl chawp ang a, khawchhungah midang nen inchiahpiah lovin an bungrua an unload zawh veleh an let leh nghal ang. An bungrua unload chhung hian midangte atanga meter hnih (2) tala hla-ah an awm tur a ni. Aarogya Setu-ah driver leh handyman-te hi in-register vek tur a ni.

6. All Mizoram Petroleum Dealers Association (AMPEDA) leh Mizoram Tanker Drivers Association (MTDA) hnuaia tanker driver leh handyman, Mizorama khawsa te, Mizoram pawn atanga oil phur lut te reng reng chu an oil phurh an unload hnu-ah Vairengte-a an awmna tur ruahmanah an khawsa ang a, hemi hmun atang hian chhungte nena intlawhpawh lovin load an thiar thin ang. Aarogya Setu-ah in-register vek tur a ni.

7. A chunga tarlan driver leh handyman-te hian kawng laka harsatna an tawh thulhah State Control Room (Toll free 1070, landline 03892335842/2335837 leh mobile 9366331931)-ah phone-in an harsatnate an thlen thei ang.

C. Sawrkar Office, Kohhran, NGOs leh office dangte

1. Mizoram chhunga office zawng zawngte chu dan pangngaiin an kal ang. Office tinah SOP for Social Distancing khauh takin kalpui tur a ni.

2. Minister-te public interview hun erawh chu khar rih a ni ang.

D. Mipui vantlang tana inkhuahkhirhna hriatturte

1. Zan dar 7:30 leh zing dar 4:30 inkarah pawn chhuah khap tlat a ni. Hemi atan hian District Magistrate ten Section 144 CrPC tlawhchhanin inkhuahkhirhna thupek an chhuah ang. Hei hian COVID-19 kaihhnawiha duty te, phai atanga bungraw phur motor in unload, chhiat tawh thil leh medical emergency-a LLTF/ VLTF ten District Magistrate-in thuneihna a pek dungzuia phalna an pek te a huam lovang.

2. Loh theih loh thil a nih loh chuan, kum 65 chin chunglam te, taksa hriselna lama harsatna nei sa te, nau pai te leh naupang kum 10 hnuailam te chu mahni inchhungah inkharkhip tur a ni.

3. Pawn (vantlang hmun/ puipunna hmun/dawr/office/damdawi in/ clinic adt.) chhuak tur reng reng chuan face mask emaw hmanraw dang hmangin hmai an tuam ngei tur a ni.

4, Vantlang hmun leh dawra kalte chu metre hnih tal-a inhlata awm tur a ni.

5. Ram pawn atanga lo lut mikhualte tumahin thlen (mikhual) phal a ni lo. Hei hian Home Department emaw Deputy Commissioner te phalna neite a huam lovang.

E. Zin veivah leh mipui chet vel chungchang

Mizorarn chhung khaw kar kawnga passenger phur lirthei (commercial passenger vehicle) leh city/ town bus, taxi, auto rickshaw leh twowheeler taxi te chuan registration-a seating capacity tarlan aia tam an phur tur a ni lo. Lirthei khalhtute leh an phurh ten face mask an vuah vek tur a ni. Passenger-te hman tur hand sanitizer an pai reng tur a ni. Commercial passenger lirtheite kaihhruaina Standard Operating Procedure (SOP) a dah hi zawm ngei tur a ni.

F. Zirna in, sakhaw biakna hmun leh mipui punkhawmna hmun te

1. Zirna in leh training institute te chu khar chhunzawm zel a ni ang.

2. Sakhaw biakna hmunah te chuan mipui punkhawmna tur inkhawm programme pangngai siam khap rih a ni ang.

3. Biak In-a zing tawngtai, inneih inkhawm leh lawmna (reception), mitthi vuina, lungphun, anniversary, politics leh pawl thila kalkhawmna chi reng rengah mi 50 aia tam punkhawm khap a ni.

4. Games & sports practice, book release leh hetiang lam chi reng rengah mi 25 aia tam punkhawmna huaihawt phal a ni lo.

5. Games & sports tournament leh mipui punkhawmna tur thil reng reng huaihawt phal a ni lo.

G. Bungraw chawkluh leh thiar chungchang

Phai atanga bungraw la lut tur reng reng chuan mCOVID-19 mobile application-a mPass hmangin declaration an thehlut tur a ni.

H. Dawr leh sumdawnna hmun

1. Dawr, sumdawnna hmun leh eizawnna hmun dangte chu a pangngaia hawn theih a ni.

2. Hawker stall te erawh chu Deputy Commissioner kaihhruaina hnuaiah LLTF/VLTF ten ruahmanna an siam anga kalpui tur a ni ang.

3. Beauty parlour, lumehna leh spa te chu hawn phal a ni a, amaherawh chu social distancing a awm theih nan appointment an siam lawk tur a ni. Tin, an hmanrua leh equipment pawh uluk takin an tithianghlim (sanitize) zel tur a ni a, customer te hming leh address mumal takin register-ah an ziaklut thin tur a ni. Heng dawrah te hian tum khatah dawrtu mi panga (5) aia tam awm phal a ni lo.

4. Mipuiin awlsam zawka thlai leh chawhmeh an hmuh theih nan veng hrang hrangah LLTF/VLTF ten chawhmeh zawrhna tur hmun an ruahman anga, metre 2 aia in hnaih lo turin thutna an ruahmansak ang. Inrinni-a mipui punkhawm luih luih pumpelh nan kar khatah ni thum (3) tal thlai thar leh chawhmeh dang zawrhna hun ruahman thin tur a ni.

5. A chunga tarlan (H. 1 to H.4) ah te hian 'Standard Operating Procedure (SOP) for Social Distancing' tha taka zawm tur a ni. SOP hi zawm a nih ngei nan LLTF/VLTF ten anmahni bial chhungah hma an la ang.

6. Public park, picnic spot, movie theatre, Gym leh intawllenna hmun zawng zawng chu khar chhunzawm tur a ni.

7. Dawr zawng zawng (damdawi dawr tiam lovin) chu tlai dar 6:00-ah khar vek tur a ni.

Il. AIZAWL MUNICIPAL AREA BIKA INKHUAHKHIRHNA DANG KALPUI DAN TUR.

Lirtheia veivah chungchang

1. Aizawl Municipal Area bikah chuan lirthei registration number 'odd even' angin an intlanchhawk ang. Even number (number inkawpkim) lirtheite chu Thawhtanni, Nilaini leh Zirtawpni-ah an tlan ang a. Odd number (number inkawpkim lo) lirtheite chu Thawhlehni, Ningani leh Inrinni-ah an tlan thung ang. Chawlhni (Sunday)-ah chuan eng motor mah tlan phal a ni lovang.

2. Lirthei intlanchhawk hian law & order duty te lirthei, COVID-19 duty atana Sawrkar hnathawkte lirthei hman, ambulance, medical/ veterinary emergency atana motor hman te, essential services (AMC hnuaia bawlhhlawh paih, bawnghnute phurh/ semna, P&E line duty, PHE tui sem, chanchinbu sem, LPG delivery, dak sem, adt.) atana motor hman te, print & electronic media mi te motor, Kohhran hminga motor register-te, mahni veng chhunga LLTF duty-te lirthei, khaw kar bus leh maxi cab service-te a huam lovang.

3. Intlanchhawk hian zing dar 9:00 atanga tlai dar 5:00 thleng a huam ang.

4. Chhiat tawh thilah, chhiat tawk hming leh veng ziakin chhungkaw member te tan leh medical emergency-ah chuan LLTF ten lirthei tlan phalna an pe thei ang. Tul bik dangah leh Aizawl atanga chhuak tur leh lo lut turte tan Superintendent of Police (Traffic) in phalna a pe thei ang. Phalna hi mCOVID-19 mobile application emaw https://mcovid19.mizoram.gov.in hmangin a dil theih a ni.

Ill. CONTAINMENT ZONES:

A tul a nih chuan Deputy Commissioner-ten an District chhungah containment zone an puang thei anga, containment zone puanah te chuan Deputy Commissioner-in thupek a siam zawm tur a ni ang.

IV. HREMNA DAN

He thupek zawm lo chu Disaster Management Act, 2005 hnuaia Section 51 atanga Section 60, The Mizoram (Containment & Prevention of COVID-19) Ordinance, 2020 hnuaia Section 5 leh IPC Section 188 hmangin hrem theih an ni.

Sawrkarin heng thuchhuah a siamte hi a tul dan azirin a ennawnin a tidanglam thei ang.