470/2024-2025

Dated Siaha 14th May, 2024:  Vawiin chawhma dar 11 khan 07- Chakhei Member of District  Council Constituency By-Election atan a hman tur Final Electoral Rolls tahrik ni 1, April  2024  tehfung a hmang a buatsaih leh 91- Lopu- II Village Council Constituency By-election atana hman tur Final Electoral Rolls, tahrik ni 1, April, 2024 tehfung a hmang a buatsaih chu DC Mini Conference Room-ah tlangzarh a ni a, Pu V.L. Hruaizela Khiangte, District Election Officer leh Bawrhsap nibawk chuan he Final  Electoral Rolls hi a tlangzarh.

Pu V.L. Hruaizela Khiangte chuan  kalkhawmte hnena lawmthu sawina a nei hmasa a. Democracy ramah chuan mipuiten an aiawh an thlan thin chu thil pawimawh tak a ni tiin, inthlanna felfai leh thianghlim zawk a awm theih nan political party, NGO leh mipuite thawhpuiah a sawm a . Final Electoral Rolls tlangzarh theih  tura  hun leh tha tam tak seng a roll buatsaihtute fakawm a tih thu a tarlangin hmalam hunah pawh theihtawp chhuah zel turin a chah nghal bawk.

Pu V.L. Hruaizela Khiangte chuan electoral rolls- a hming thun kawngah   fimkhur a tul hle a ti a. India khua leh tui dik tak, kum 18 tling chin chauh thun theih a ni tih tarlangin, Member of District Council (MDC) leh VC election bikah chuan Tribal, Siaha district- chhunga piang leh seilian  an ni ngei ngei tur a ni, a ti. Inthlanna a  tling duh luat vanga diklo taka roll- a in thun  hian nakin hunah rah tha a chhuah dawn lo a ni tih sawiin, kawng engkimah fimkhur a tul tak zet a ti.  E/roll- a vawikhat inthun a nih tawh chuan in paih leh mai chu thil harsa tak a ni tawh thin a, in paih tur pawhin pawl ang ni lo a mimal hming a 'objection' siam a ngaih tawh thin avangin harsatna tawk lo tura hmalak a tul tiin, Political party teh NGO-te chu theihtawp lo chhuahpui zel turin a sawm a ni.

Diklo taka Birth Certificate pekchhuah a awm thin nia sawi chu pawi a tih thu tarlangin Pu V.L. Hruaizela Khiangte chuan Birth Certificate pechhuak thinte chu fimkhur zual turin a chah a. Birth Certificate diklo hmanga  E/ roll - inthun palh pawh thil awm thei a ni a, E/roll- a vawikhat inthun a nih chuan  'Indian citizen' an lo ni tawh anga hei hian harsatna lian zawk min siam dawn a ni, a ti.

Pu V.L. Hruaizela Khiangte chuan Inthlanna felfai leh thianghlim tak nei turin mawhphurhna nei zawng zawngte theihtawp chhuah turin a chah a. Mipuiten mi tha leh dik, veng leh khawtlang bakah ram leh hnam  tana mi tangkai tak thlang chhuak ngei turin 07- Chakhei leh 91- Lopu- II bial mipuite duhsakna a hlan nghal a ni.

Vawiina tlangzarh tak Final  Electoral Rolls atanga a lan danin 07- Chakhei Member of District  Council (MDC) Constituency- ah khua pali, Chakhei, Chakheitla, Siasi leh Chheihlu te awmin  vote nei mipa-916  leh hmeichhia-959    awmin, vote nei zawng zawng hi mi- 1875  an awm a. 91- Lopu- II Village Council Constituency - ah vote nei mipa-73 leh hmeichhia -69 awmin, Vote nei zawng zawng mi- 142 an awm bawk.

Final  Electoral Rolls  tlangzarh tak hi Political party aiawh lo kalkhawmte hnenah Copy khat theuh Pu V.L. Hruiazela Khiangte, District Election Officer (DEO) chuan a hlan nghal a ni.