471/2024-2025

2024 Ṭomir thla ni 14: Vawiin khan 11th Lai Autonomous District Council (LADC)-a Chief Executive Member (CEM) atana ruat thar Pu C. Lalmuanthanga chu LADC Hall, Lawngtlaiah Lawngtlai District Bawrhsap Pu Cheemala Siva Gopal Reddy chuan rinawmna thu tiamtirin a la lut.

CEM thar lak luh inkhawm hi LADC-a Executive Secretary Pu K. Lalthanzara'n a kaihruai a. LIKBK General Secretary Rev. B. Zazawna Lai chuan hunserh hmangin, hun kaihruaitu ES-in LADC (Constitution, Conduct of Business, etc.) Rules, 2010 rule 21 sub-rule (4) tlawh chhana LADC CEM atana Pu C. Lalmuanthanga ruatna sawrkar notification No. A. 43016/1/2020-DC&MA(L)/Pt Dt. 9th May, 2024 a chhiar chhuak a. Hemi hnu hian Lawngtlai Bawrhsap chuan CEM hi a la lut nghal a. CEM thar Pu C. Lalmuanthanga chuan thu a sawi bawk.

CEM lak luhnaah hian MLA pathum, Dr Lorrain Lalpekliana Chinzah, Pu C. Ngunlianchunga leh Pu Robert Romawia Royte te bakah, MDC-te, state leh LADC-a official-te, political party hruaitute, kohhran leh NGO hruaitute leh chanchinbu mite an tel.

CEM thar Pu C. Lalmuanthanga chuan a kaihhruai sawrkar a pian theih nana hma latute chungah lawm thu sawiin, Mizoram Governor leh Chief Minister hma lakna chu fakawm a tih thu a sawi a. LADC-ah huapzo, mipui sawrkar din leh lang tlang taka sawrkar kalpui a tum thu sawiin, LADC Budget ringawt chu innghahna tham a nih loh avangin hmasawnna huam zau zawk dap chhuak tura ṭan lak chu a ngaih pawimawh zingah a telh tur thu a sawi a. Lairam mipuite, kohhran leh tlawmngai pawlte leh chanchinbu mite chu ram hruainaah a ṭulna apiangah thurawn pe a, finchhuah ṭhin turin a sawm a ni.

CEM thar hian Deputy Leader atan Lungtian bialtu MDC, Pu Sanghuliana Mualchin a ruat thu a puang nghal a ni.

Kumin March ni 7 khan LADC-a CEM ni lai Pu V. Zirsanga chuan CEM aṭanga banna theh lutin, LADC-ah sawrkarna siam tura legislature party majority nei thei an awm zui loh avangin Mizoram Governor chuan March ni 15, 2024 khan Lawngtlai Bawrhsap Pu Cheemala Siva Gopal Reddy chu LADC Caretaker atan a ruat a. May ni 1, 2024 khan MNF MDC 12 leh INC MDC 1 te'n United Legislature Party dinin, 6-Lungpher South MDC Constituency bialtu MDC Pu C. Lalmuanthanga, INC member kaihhruainaa sawrkar thar an din theih thu chu LADC Caretaker kal tlangin Mizoram Governor hnenah an thlen a. Hei hi Mizoram Governor chuan pawmpuiin, May ni 7, 2024 khan LADC CEM atan Pu C. Lalmuanthanga chu a ruat a. Hemi bawhzui hian vawiin khan CEM thar lak luhna chu buatsaih a ni ta a ni.