472/2024-2025

Dated Serchhip, the 14^th May, 2024: Vawiin khan Serchhip DC Pu David Lalthantluanga hovin Lok Sabha Inthlanpuia Serchhip District huamchhung Assembly Segment pathuma vote tla te chhiar dan tur leh inbuatsaihna chipchiar taka thlirho a ni a. Mawrhphurhna nei ten tha taka an hna hlen theuh turin DC hian a chah a ni.

Pu Gaston Vanlalhriatpuia, Election Officer chuan vote chhiar tura inbuatsaihna kalpui dan sawiin May ni 22, 2024 hian EVM Engineer te Serchhipah lo kalin First Level Checking neih tum a nih thu a sawi a. May ni 29 leh June ni 3 ah te Vote chhiartu tura ruatte training neihpui an nih dawn bakah May ni 28 ah hian an awmna tur randomization tihfel tum a nih thu a sawi bawk.

SP Pu MS Dawngkima chuan venhimna khauh taka kenkawh a nih tur thu sawiin, ECI in ruahmanna a siam anga an inpeih fel tawh thu a sawi a. DC Office gate puiah lirthei tlanluh phal anih dawn loh thu a sawi bakah tha taka vote chhiar anih theih nan an tih turte an hlen ngei theih a beisei thu a sawi a ni.

ECI-in phalna a pek Authority Letter nei chanchinbu mite tan Counting Hall bulah Media Centre siamsak an ni a. Media Centre atang hian round tina vote tla chu mipuite hriat turin au rinna hmanga puan chhuah a ni ang.

Meeting-ah hian Addl. DC Pu James Lalnithanga, Serchhip SP Pu MS Dawngkima, SDO (S) Pi Rebecca Laldinmawii Hrahsel leh mawhphurhna pawimawh dang chelhtute an tel a ni.