473/2024-2025

Sialhawk, 14th May, 2024: Vawiin khan KVK Khawzawl chuan Sialhawk Community Hall-ah Serthlum chin leh enkawl dan zirtirna (training) an pe. He hun hi Serthlum Growers Society Sialhawk te huaihawt niin Serthlum chingtu mi 35 an kalkhawm a. Dr. Malsawmkimi, Senior Scientist & Head, KVK Khawzawl chuan kaihruaiin kalkhawmte hi zirtirna a pe a ni. Sialhawk khua hi in 500 vel niin chhungkaw 100 velin Serthlum hi eizawn nan an ching a, kum 2023 chhung khan serthlum an chin atangin Rs. 70,00,000 (nuai sawmsarih) vel an la lut a ni.

Tin, nimin (May ni 13, 2024) khan Neihdawn khuaah KVK Khawzawl te hian Indian Institute of Horticulture Research-North Eastern Hill Region (IIHR-NEH) te nen tangkawpin Tomato Growers, Neihdawn te hnenah Tomato chin leh enkawl dan zirtirna an pe bawk a. Dr. Malsawmkimi, Senior Scientist & Head chuan kaihruaiin Tomato chingtu mi 74 an kalkhawm a ni. Kalkhawmte hnenah hian Tomato chi sem chhuah a ni a, National Center for Integrated Pest Management (NCIPM) hnuaiah Tomato enkawlna tur damdawi pek an ni bawk.