Vawiin chawhnu dar 2:00 khan UD & PA Minister Pu Zodintluanga pisa-ah Central sawrkar hnuaia 10 % Lumpsum Grant chungchangah meeting pawimawh tak neih a ni a. He meeting ah hian Parliamentary Secretary (Home) Pu Lalrinmawia Ralte leh Additional Chief Secretary Pi L. Tochhong te bakah - Home Department te, Rural Development Department te, UD & PA Department te, Fisheries Department te leh Planning Department atangin Senior Officer te kokim takin an tel a ni.

UD & PA Minister Pu Zodintluanga chuan meeting koh chhan sawi fiahin, “Central sawrkar hnuaiah hmarchhak state te pualin Ministry tin deuh thawin an budget atangin 10 % an serh hrang a. He pawisa hi kan chanpual liau liau a nih avangin a haichhuah leh hailuh kawngah tun aia tan kan lak a tul a ; kan chanvo dik tak a nih avangin inthlahrung hauh lova kan chuh thiam a ngai hle a ni,” a ti a. He meeting-ah hian Pu Zodintluanga chuan Department hrang hrang hotute chu Central sawrkar hnuaia anmahni line Ministry theuh hnuaia hmarchhak tana sum ruahman a nih dan ziakna lehkha a sem theuh a ; Mizoram tana lukhawng nei tham project duan kawnga tan lak dan turte pawh a sawifiah a ni. UD & PA Minister chuan, “Department tinte hian kan budget sum neih sa leh Central sawrkar atanga kalphung pangngaia pawisa kan dawn thin ringawt hi kan duh tawk tur a ni lo va ; kan ram leh mipuite tana thil chhenfakawm thawhna turin he 10 % lumpsum grant hi tangkai taka hmang turin kan rilru leh ngaihtuahna kan tuaithar a ngai a. Tanpui kan ngaihnate sawi hreh lovin, kan in mamawh tawnna apiangah inpuitawn dial dial turin thawhhona rilru tha tak kan put a ngai a ni,” tiin officer te chu a fuih a ni.

Parliamentary Secretary Pu Lalrinmawia Ralte pawhin fuihna thu sawiin, “Hmarchhak State te zingah NLCPR pawisa haichhuah kawngah kan hnufum deuh niin a lang a ; vawiin atang hian Department tina officer-te i insang mar ang u” a ti a. Additional Chief Secretary Pi L. Tochhongi pawhin, “Planning Department kaltlang kher ngai lova project thehluh theih apiangte chak takin bawhzui ila ; Department anga kan tih theih chin bakah kan hotute nen a tul ang zelin tan kan la dawn a ni” a ti.