Kum 2012 - 2013 chhunga Mizoram sum hman tur chu vawiin khan New Delhi ah Chief Minister Pu Lal Thanhawla leh Planning Commission Vice Chairman Montek Singh Ahluwalia ten cheng vaibelchhe 2300 ah an ti fel ta. He Plan size atang hian cheng vaibelchhe 200 chu Finance Ministry, Govt. of India sum neih belh remchan dan a zirin, kawngpui tih hmasawnna (special road development programme) tur atana dah a ni.

Mizoram plan size tih fel rual hian Hmarchhak State dang thenkhatte pawh tihfel a ni a. Mizoram Plan size hi 35% in a pung a, kum dang zawng aia a pun tam ber tum a ni. Assam Plan punna chu 16% a ni a, Manipur 9% leh Tripura 15 % a ni.

Montek Singh Ahluwalia chuan Mizoramin ei leh bara a hnianghnar theih nan leh alo intodelh theih nan ei leh bar tharchhuahna kawngah beihpui thlak tum a ni a, hemi atan hian agriculture leh a kaihhnawih sector-ah sum tam zawk dah a, NLUP hnuaiah chak taka kalpui tum a ni a ti a. Agro based indutries te, food processing, micro industries leh bamboo based industries te chawikan a ni ang a ti.

Chief Minister Pu Lal Thanhawla chuan 12th Plan chhungin sum lamah inrelbawlna tha kan nei a, leiba pawh 2.4% kan pelh tir lo a ni a ti a. Kum 2003 - 04 atang khan revenue surplus kan nei a ni a ti. Chief Minister chuan hmasawnna ruangam te tluang taka hman anih theih nan power policy leh industrial policy te siam thar in, NLUP changtlung zawk leh management policy te kan duang thar a ni a ti. Central schemes te tangkai zawka hman anih theih nan, a guidelines a harsatna awm te siamtha tura ngen in, state plan leh central scheme te tha zawka a hman pawlh dan kawng dap nise tih te a sawi bawk a ni.