No.2613/2021-2022

Aizawl Khuangchawi thla ni 14, 2021: Vawiin khan 10th Chakma Autonomous District Council (CADC)-a Chief Executive Member (CEM) atana ruat thar, 1-Borapansury MDC bial atanga thlan tlin Pu Rasik Mohan Chakma chu CADC Art & Culture Hall, Chawngteah Lawngtlai Bawrhsap Dr Andrew H. Vanlaldika chuan rinawmna thu tiamtirin a la lut.

CEM thar lak luh inkhawm hi CADC-a Executive Secretary Pu Pronit Bikash Chakma chuan kaihruaiin, CADC (Constitution, Conduct of Business, etc.) Rules, 2002 rule 22 sub-rule (2) & (3) tlawh chhana CEM atana Pu Rasik Mohan Chakma ruatna sawrkar notification No. A. 43016/3/2018-DC&MA(C) Dt. 11th October, 2021 chu a chhiar chhuak a. Hemi hnu hian Lawngtlai Bawrhsap chuan CEM hi a la lut nghal a. CEM thar Pu Rasik Mohan Chakma chuan thu a sawi bawk.

10th CADC-a CEM 3-na Pu Durjya Dhan Chakma chuan October ni 3, 2021 khan Mizoram Governor hnenah CEM atanga banna a theh lut a. Hemi hnua MNF Legislature Party Leader atana thlan, Pu Rasik Mohan Chakma chu Mizoram Governor-in October ni 9, 2021-a CADC CEM atana a pawmpui hnuah vawiin khan CEM thar lak luhna hi buatsaih a ni ta a ni.

Pu Rasik Mohan Chakma hi 10th CADC term chhunga CEM a nih tum hnihna a ni a. Kum 2018 May thlaa 10th CADC Executive Committee din a nih atangin Pu Shanti Jiban Chakma, Pu Rasik Mohan Chakma, Pu Durjya Dhan Chakma leh Pu Rasik Mohan Chakma te chu CEM an ni tawh a ni.

Attachment

  • Loading attachment...