No.2614/2021-2022

Aizawl Khuangchawi thla ni 14, 2021: Vawiin khan Lawngtlai Bawrhsap Dr Andrew H. Vanlaldika chuan Chawngte tlawhin, health department, police department leh Chakma Autonomous District Council official-te, Central Young Chakma Association, Chakma Mahila Samiti leh Mizoram Buddhist Association hruaitute nen COVID-19 dona leh vaccine pek chungchanga Chakma Autonomous District Council (CADC) huam chhung dinhmun an thlir ho.

Bawrhsap Dr Andrew H. Vanlaldika chuan hri leng dona kawngah sawrkarin amah maiin thil a ti thei lo va, kohhran, tlawmngai pawl leh mipui tawiawmna a mamawh a, tan rualna nen hripui chu do hneh theih a ni tih a sawi a. CADC huam chhunga sawrkar hna thawk, CADC leh pawl hrang hrangte chu theih tawp chhuah zel turin a fuih a ni.

He hunah hian health department-a thawktute chuan CADC huam chhung report pein, vaccine pek chungchanga harsatna an tawhte an tar lang a. Fur laia tlawh pawh hleih theih loh khua eng emaw zat a awm avangin vaccine pek chungchangah harsatna an tawk tih sawiin, ruahtui hul hunah chuti ang khuate chu tuam chhuah an tum thu an sawi.

Vawiin thut khawmah hian COVID-19 dona leh vaccine pek chungchangah tlawmngai pawl leh sakhaw hruaitute thawhpuinain mipui hnenah zau zawka zirtirna puanzar ni se, tih a ni a. Mipui zirtirna atan hian video clip siam ni se, tih a ni bawk.

Attachment

  • Loading attachment...