Mizoram State Control Society thuneitu sang ber Governing Body Meeting vawi sawmna chu vawiin chhun khan I&PR Conference Hall-ah a chairman, Health Secretary Pi Esther Lal Ruatkimi kaihhruaina in an thukhawm a, kohhran, tlawmngai pawl, chanchinbumi leh Sorkar Department aiawh hrang hrang memberte an tel tha hle.
Meeting kaihruaitu Pi Esther Lal Ruatkimi chuan meizuk do leh a tih remna kawnga society hmalakna chu mipui mimir, kohhran, tlawmngai pawl leh chanchinbumi te tanpuina lo chuan a sawt mawh hle a ni, a ti a. Amaherawhchu, heng pawl hrang hrang thawhhona avang hian society hmalakna chuan hma a sawn ve zel hi thil lawmawm tak a ni a ti.
Vawiin meetingah hian kum kalta chhunga an hmalakna thlir kir a ni a, an hmachhawp dah mek kalpui dan sawiho a ni bawk. Mizoram chhunga meizial zuk do kawnga an hmalakna leh Mizoram chu meizu awm lohna state a siam tura chak taka kalpui chungchangah kohhran pawl hrang hrang thathawh sawi lan a ni a. Presbyterian hnuaia Synod Social Front-in khawtinah zirchianna an kalpui thute, nakum atang chuan Sunday School zirlaiah meizuk that loh zia telh tum anih dan te sawilan a ni a. Thingtlang khawtinah YMA leh MHIP hmalakna a inzirtirna huamzau zawk kalpui tum a nih thu pawh vawiin meeting-ah hian tarlan a ni.
MSTC hnuaia Data Entry Operator thlatin lawmman Rs. 6000/- atanga Rs. 8000/- a tih pun leh Peon lawmman Rs. 4000/- atanga Rs. 6000/- a tihsan rawtna chu vawiin meeting-ah hian pawmpui a ni a. Puipunna hmuna meizu manna dan COTPA hmanga sum an chawi tir zat October, 2008 atanga January, 2013 chhunga tlingkhawm zat chu Rs. 1,65,017 a ni a, heta tang hian za a sawm nga chu Mizoram budgetah chhunluh niin a bak zawng chu MSTC hian tul hrang hrangah a hmang a ni.
Vawiin meeting-ah hian khawvel pum huap Golbal Adult Tobacco Survey (GATS), 2014 kalpui dan tur tlangpui pawh sawiho a ni a. Tun dinhmunah Mizoramah hian vaihlo leh a kaihnawih hmang hi 67% a ni mek a, hei hi rampum huapa sang ber a ni. Vaihlo hmang mipaah 72% an nih laiin hmeichhiah 62% an ni thung a. Mipa hian tlakhniam lam an pan laiin hmeichhe lam hian san lam an pan thung ni a tarlan a ni bawk.
