Vawiin khan FCS&CA, Transport, etc. Minister Pu John Rotluangliana chuan Assembly Secretariat Conference Hall a chhiatrupna lo thlen thulha rang taka hmalak dan chungchang zirhona - Capacity Building Development Programme Table Top Exercise chu a hawng. Hawnna inkhawm hi Pu PC Lallawmsanga, DM&R Principal Secretary-in a hmanpui bawk a ni.

Minister chuan DM&R Department-in chhiatrupna lo thleng thei chungchanga mipui mimir zirtirna kawngah hma tha tak an lak thu leh ram tana an hnathawh hi ropui tak a ni tiin, thawktute chungah lawmthu a sawi a. DDMA chuan Chief Minister hona hnuiah chak takin hma a sawn thu sawilangin, chhiatrupna thleng theiah hian ram hruaitute leh Sorkar Department-te bakah tlawmngai pawl, Kohhran leh mimal tinten mawhphurhna leh tih theih kan nei vek a ni, tiin Minister chuan Table Top Exercise chu hlawkthlak taka hmang turin kalkhawmte chu a chah a ni.

Vawiina Table Top Exercise neih hi National Disaster Management Authority (NDMA) Consultant, Brig. BK Khanna hova neih a ni a. Chhiatrupna laka kan inven dan tur kawnga Aizawl, Mamit, Champhai leh Kolasib District-te bakah Police, Fire and Emergency Services leh Medical Department-te inpuahchah dan powerpoint hmanga thlirho a ni a. 1st Bn. NDRF Assisstant Commandant atangin NDRF Bn. chungchang leh hnathawh dan tlangpui ngaihthlak a ni bawk.

NDMA ho hian ni 5.02.2014 (Nilaini) hian chhiatrupna a lo thlena chetlak dan lemchan (Mock Drill) hmun nga ah neih a ni dawn a. Solomon’s Cave, Secretariat Annexe I, Civil Hospital, M.I.C.E School leh hotel pakhatah a ruala neih tum a ni. Mock Drill neih lai hian Siren-te tih rik a ni dawn bakah, chhanchhuaktu (respondent) pawl chi hrang hrang pawh an chet chhuah dawn avangin mipuite lo chi ai lo tuin Aizawl DC chuan a ngen bawk a ni.