National Council of Churches in India (NCCI) in a kum za tlin lawmna Kolkata YMCA Buildinga a hman mekah vawiin khan Chief Minister Pu Lal Thanhawla chu Khuallian a ni a, a nupui Pi Lal Riliani pawh Khualzahawm a ni.

NCCI kum za tlin lawmna vawiina thusawiah, Khuallian Chief Minister Pu Lal Thanhawla chuan Indiaa Kristian mi hmasate thawhrimna rah kal chho zelah kohhran hrang hrangte phuarkhawm theia NCCI alo piang thei hi Chandamtu Lal Isua Krista hnathawh ropui tak lantirtu a ni a ti a. Hetianga kristian kohhran hrang hrang puanzar khat hnuai NCCIin lungrual taka a khaikhawm thei hi a lawmawm tak meuh a ni a ti.

Kan kristian unaute Odisha state a tihduhdah an nih thinna avanga NCCI in thuneitute hnena a hmalaknate chu fakawm a tih thu Pu Hawla chuan a sawi a. India ram hi Hindu sakhua te, Buddhist te, Sikh te leh Jain sakhuate pianna niin, kristianna chu AD 52 khan alo lut ve a, nimahse kum za tam tak chhung chu a thang theilo a ni a ti a. Historian milar K.N.Pannikar phei chuan India ram awptu kumpinu chhuah rualin kristianna hi a bo zui ang alo ti hial a, nimahse hei hi chu kan Lalpa Isua Krista avangin a thleng diklo a ni a ti. Kum engemaw tih lai khan kristianna zuitute hi Indiaah kum khatah mi maktaduai nga dawn tein kan pung a, kum 2001 chhiarpuia a lan dan chuan 2.34% zah kristian kan awm a ni a ti.

Chief Minister hian NCCI in hma an lakna kawngah thil hrang hrang, Europe ah kumzabi 20 chhunga kristianna nasa taka a tlakhniam thute, Asia leh Africa khawmualah a pun chhoh thu te, Indiaah kum 1881 leh 2001 inkar chhunga Hindu, Sikh, Buddist sakhuate 12% vela a tlakhniam thute hre reng chunga kal turin a duhthu a sawilang a. Hengte ngaihtuah chung zelin kristian inpumkhatna te, NCCI thil tum bulpui kalpui zel chungchangahte, Europe a kristianna tlakhniam avanga a awllai hnawhkhat tura ‘look west policy’ hawizawnga kal a tha em tih ngaihtuah thute sawiin, Pu Lal Thanhawla chuan Council for World Churches kaltlanga Englandah Mizo Missionary pahnih tirh an nih thu phur takin a sawi lang a. Heng bakah kristian mi ten kawng tam takah vantlang tana thil tha an thawhte pholan tha a tih thute a sawi a. Remna leh Muanna din thuah kristianna in nasa taka hna a thawh thawh theih dan sawi bawkin, entirnaah kristian kohhran, abikin synod leh baptist te leh congress political partyte thawhhona avanga Mizoramah remna leh muanna thlen a nih thu Pu Lal Thanhawla hian a sawi a. Hemi zawhah hi a chuan inpawm tlanna leh inhriatthiam tawnnain a zui a ni a ti. He Mizoram Model hiIndiahmarchhak kristian awmna stateah te a hman ve theih a ni a ti.

Chief Minister chuan India ram chhung leh khawvel hmun danga thil inthlakthleng dan zir zela lo hmachhawn dan thiam turin NCCI chu a chah a. Pathian ram zau zel nan leh a Ropui na turin A malsawmna NCCI in an  dawn zel chu a tawngtaina a ni fo dawn a ni a ti.

Chief Ministeer Pu Lal Thanhawla hian NCCI hotu, mi sawm pathum te tan nizan (03.2.2014) khan zanriah a buatsaih sak a, hetah hian Bishop Rt. Rev Dr. Tarapath S. Sagar, President, NCCI leh Bishop Phillip Massey, CNI te pawh an tel a ni. He Centenary lawmnaah hian ram chhung leh ram pawn atangin Kristian palai engemawzah an tel a ni.

Inkhawm kaihruaitu Chairman Rev. Dr. Augustine Jayakumar leh Bishop Rt. Dr. Tarapath S. Sagar a te chuan Chief Minister chu a hun chep tak leh hlu tak kara he hun a rawn hmanpui thei chu lawmthu an sawi a. Chief Minister hnenah Mizoram khua leh tui nih ve a christian hruaitu Chief Minister rorelna hnuaia Mizorama awm ve an chak thu an hrilh a ni. Inkhawm mipui ten an lawm hle a kutbeng thawm a ring hle a ni.

Chief Minister hian naktuk ni 5.2.2014 tlaiah Senate of Serampore College buatsaih Inauguration of the Research/SAPHRY Building Inkhawm a hmanpui bawk dawn a ni.