November ni 15-18 chhunga neih ‘10th Mizoram Higher Secondary School Games 2011’ chu vawiin chawhnu khan Ramhlun Sports Complex-ah Khuallian Mizoram Assembly Speaker Pu R. Romawaia’n a khar. He HSS Games-ah hian school 25 atangin zirlai1302 ten infiamna discipline hrang hrang 7- badminton, volleyball, table tennis, football, hockey, judo leh athletics -ah an inel a, a pumpuia Champion chu Govt. Mizo Higher Secondary School, Aizawl a ni.

Games Puanzar pawt thlaa kharna thuchah sawiin Assembly Speaker chuan Mizoram HSS Games buatsaih a lo ni ta hi a lawmawm tak zet a, zirlaite talent phochhuahna leh Mizoram mai nilo state dangte nena inelna National School Games-a tel theihna lo inhawng zel ta hi zirlaite vanneihna a ni zel a ni, a ti. Mizoram-in hmasawnna hrang hrang a neih mek zinga langsar ber pakhat chu infiamna lama kan thalaiten an theih an chhuah hmuh tur awm ta fo hi a ni, a ti bawk. Rampum huapa zirna kalphung mumal tak mithiamten duangin National Policy on Education an buatsaihah pawh Sports leh Physical Education chu dah pawimawh hle a nih thu a sawi a. Zirna leh Sports hmang kawp thiam tan chuan rilru leh taksa hriselna bakah hlawhtlinna ngelnghet tak thlentu a ni thei a ni, a ti.

Vawiina khar tak 10th Mizoram HSS Games 2011-ah hian Khuallian chuan infiamna hrang hrang lawmman a sem a. New Atlantis School ten Pipe Band Show an entir bawk a ni.