Vawiin chawhnu khan 10th Mizoram Oil Palm Advisory Committee neih a ni. Member Secretary Dr.C.Lalzarliana, Director of Agriculture (CH) chuan Oil Palm chin kawnga hmalak hrang hrang report pe in Oil Palm hi ram 13,056 Hactare a zauah chin tawh niin tun kum 2013 hian 4,510 Ha. a zauah chin belh a ni a, tin, nakkum 2014-2015, 2015-2016 & 2016-2017 target area tur te meeting-ah hian rel a ni.

Meeting-ah hian Oil Palm chin kawnga hmalak zel dan tur ruahmanna te siam in, Company-te hmalak chhoh zel dan tur leh Oil Palm rah sawng bawlna Oil Palm Factory Bukvannei, Kolasib District-a kalpui mek thlir hona leh Serchhip leh Lunglei a Oil Palm Factory din dan turte uluk tak a sawi hona neih a ni. Company pathum(3)- Godrej Agrovet Ltd, Ruchi Soya Industries Ltd, 3F Oil Palm Agrotech Pvt Ltd. ten Oil Palm Factory dinna atan a an hma lak mek dan report an pe a, Godrej Agrovet Ltd. chuan kumin hian Factory hi hman theih turin hma an lak mek thu an sawi.

Oil Palm rah (FFB) hi Company ten Kg khat Rs 4.75/- zel a leiin kum 2008 atang khan 2318 MT thar chhuah tawh a ni a, Rs.110 lakhs man zet Oil Palm chingtuten an hralh chhuak tawh a ni. Meeting-ah hian Oil Palm tiak (seedling) man chung chang pawh sawi ho a ni.

West Serzawl, Chuanchung ramah 50 Hactare a zauah Oil Palm chi siam na (Seed Garden) chu Central Sorkar bul tum in hma lak mek a nih thu Department hotuten an sawi a. Oil Palm chi (Sprout) hi ram dang atanga lak luh ngai tawh lovin tun atanga rei lo teah kan siam chhuah ve tawh dawn thu Department hotuten an sawi bawk.

Tunah hian Oil Palm hi district Paruk(6) ie. Aizawl, Kolasib, Mamit, Serchhip Lunglei & Lawngtlai-ah te chin mek a ni.