Nimin khan Pi Malsawmthangi, Director SCERT chuan a office-ah Mizoram aiawh a 3rd National Science Exhibition and Project Competition, 2013 a kal zirlai leh an hruaitute te chu lawmpuina thingpui inpuiin inkawmna hun a hmanpui.
He hunah hian Pi Malsawmthangi chuan SCERT-in zirlai leh zirtirtute tan education exposure programme tha tam tak a neih thu sawiin, hei hi tun aia hmang tangkai turin a chah a ni. Mizoram aiawh a kal te chuan an competition telna atang chuan Science leh Mathematics zirna pawimawhzia an hriatchhuah thar thu leh an rualawhna a nasat phah zia te an sawi bawk.
INSPIRE (Innovation in Science Pursuit for Inspire Research) Award hi Sorkar laipui Dept. of Science & Technology hmalakna pawimawh tak a ni a. Zirlai thiamthei ten Science leh Mathematics zirnaah tuina leh phurna an neih theihna tur atan ruahman a ni.
Science Promotion Wing, SCERT-in INSPIRE Award Scheme hnuaia hmalaknaah hian District level-ah Exhibition hi neih hmasak a ni a, tichuan state level-ah exhibition hi neih leh niin, heta titha te hi National Level-ah tel tir an ni thin a ni.
Mizoram atanga project entir zingah hian H. Lalhruaizela, Class-VII, 3rd Battalion English Medium School, Mualpui, Aizawl ami in a entir “Hydraulic Gripper” chuan State Award a dawng a. Lalhlimpuia, Class-VIII , Govt. Standard Middle School, Thenzawl chuan he Award hi zirlai naupang maktaduai khat (1 million) hnena pek tlinna tur 34-a a daih lohna tihtlin nana thlanchhuan zingah a tel a ni. He lawmman semna inkhawmah hian India Vice President M. Hamid Ansari chuan lawmman te hi a sem a ni.
