533/2024-2025
2024 Ṭomir thla ni 21: Vawiin chhun dar 12 khan 11th Chakma Autonomous District Council (CADC)-a Executive Member (EM) atana ruat thar, 3-Chhotapansury Constituency bialtu Member of District Council (MDC) Pu Supreme Raj Chakma chu Arts & Culture Hall, Kamalanagar-ah Lawngtlai Additional Deputy Commissioner Pi B. Malsawmtluangi chuan rinawmna thu tiamtirin a la lut.

Lak luh inkhawm hi CADC-a Executive Secretary Pu Pronit Bikash Chakma chuan kaihruaiin, EM atana Pu Supreme Raj Chakma ruat a nihna Mizoram sawrkar notification a chhiar chhuak a. Hemi hnu hian Additional DC Pi B. Malsawmtluangi chuan Pu Supreme Raj Chakma chu thu tiamtirin, 11th CADC-a EM ni turin a la lut nghal a ni.

Vawiina EM thar lak luh inkhawmah hian Chief Executive Member (CEM) & Tuichawng bialtu MLA Pu Rasik Mohan Chakma bakah, CADC-a member-te leh official pawimawhte an tel a. CEM Pu Rasik Mohan Chakma chuan thu a sawi bawk.

Pu Supreme Raj Chakma hi 11th CADC Inthlanpui 2023-ah khan Indian National Congress (INC) ticket-in Chhotapansury bial aṭangin MDC atan thlan tlin niin, a hnuah MNF party a zawm a. CADC CEM-in EM atana a rawtna chu May ni 7, 2024 khan Mizoram Governor chuan lo pawmpuiin, vawiin khan EM atan hian lak luh a ni ta a ni.

CADC-ah hian elected MDC seat 20 a awm a. Tunah hian 11th CADC-ah EM pasarih awmin, CEM hovin Executive Committee-ah member pariat an awm mek a ni.

Attachment

  • Loading attachment...