532/2024-2025

Champhai, the 21st May, 2024: National Disaster Management Authority (NDMA) leh District Disaster Management Authority (DDMA) tangkawp buatsaihin vawiin khan Champhaiah  lirnghing thlen thulha chetlak dan tur nunchan zirna, District Level Mock Drill on Earthquake hlawhtling taka buatsaih a ni.

District Level Mock Drill on Earthquake lemchan entirin a tarlan ang chuan chawhma dar 11:00 khan lirnghing thlen thu Siren ti riin hriattirna pek chhuah a ni a. Mock Drill lirnghing nat zawng hi 7.5 magnitude niin power shut down nghal a ni a, District Disaster Management Authority (DDMA) buatsaih District Disaster Management Plan (DDMP) anga hmalak nghal niin, hemi kaihhnawih Official hrang hrangte chu District Emergency Operation Centre (DEOC) atana ruat Circuit House Conference Hall-ah tlan khawmin hmalak dan tur an Chairman Pu James Lalrinchhana, District Bawrhsap ni bawk hovin an rel a. Incident Commander turte ruat niin chhiatna thlen thu report-na hmunah tirhchhuah an ni a. Staging Area atana ruat Circuit House tualah Quick Response Force, Medical Team, Fire & Emergency Services leh disaster kaihhnawih hrang hrangte awmin chhiatna report dawn a nih ang zelin DDMA Chairman thupekin tirhchhuah nghal zel an ni a. An ni tih theih bakah hian DDMA Chairman ngenna angin NDRF te'n chhanchhuah hna an thawk chhunzawm bawk a ni.

Mock Drill kalpuia chhiatna thlenna hmun atana ruat Springdale Academy, Zotlangah  chhanchhuah hna thawktute'n lirnghing thlen thulha chet lak dan tur nunchan zirin chhanchhuah hna an thawk a; hemi rual hian lirnghing avanga harsatna dang thleng Zotlang Bazar (Kangmei chhuak) leh Tourist Lodge thlang, New Champhai (Leimin) avanga harsatna thlengte pawh buaipuiin PWD te'n kawng ping an thenfai bakah kangmei chhuak Fire & Emergency Services lamin thelhin nunchan an zir bawk a. Medical Team te'n hliam tuarte enkawlna pein a nazualte Champhai khawpui chhunga Damdawiin hrang hrangah Ambulance leh Private Motor remchang ang angte hmanga phurh thlen niin, Damdawiin lama thawktute pawhin chhiatna thlen thulha chetlak dan tur inpuahchahna tha takin an entir bawk a ni.

District Level Mock Drill on Earthquake neih zawhfel hnu hian Circuit House Conference Hall-ah mock drill kalpui dan thlirlet a ni a. He hunah hian Incident Commander leh Observer atana ruatte hnen atangin mock drill an hmuh dan tlangpui ngaihthlak a ni a. Chhiatrupna thleng thulha chetlak kawngah enge hmasawn ngaihna lai leh bawhzui tul nia hriatte chipchiar taka sawiho a ni a. Inbiakpawhna hmanraw tha zawk leh training changtlung zawk neih a pawimawh thu tarlan a ni a. A tlangpui thuin mock drill neih dan chu tha thawkhata hriat niin hei hian nakin zel atana lo inpuahchah lawk kawngah awmze thui tak a neih ngei beisei a nih thu leh thawhhona tha neih a tulzia mock drill atanga zirchhuah a nih thu he hunah hian tarlan a ni bawk.

DDMA Champhai chuan hlawhtling taka District Level Mock Drill on Earthquake neih a nih theih nana Line Department hrang hrangte, Springdale Academy Zotlang, New Champhai leh Zotlang khawtlang mipui leh VLDMC te, Champhai khawpui chhunga Damdawiin hrang hrangte, NDRF, QRT, Assam Rifles, GREF BRTF leh mawhphurhna hrang hrang tha taka hlenchhuaktute chungah lawmthu a sawi a ni.