Kumin 2012 April thla atanga India ram puma hman tan tur, 12th Five Year Plan chhunga Mizoram sorkar department hrang hrangte kal dan tur sawihona, ‘Brainstorming Session and Vision Sharing on Formulation of 12th Five Year Plan’ tih Mizoram State Planning Board buatsaih chu vawiin khan Tourist Lodge, Chaltlang-ah neih a ni a, Chief Minister Pu Lal Thanhawla’n a hmanpui.

Chief Minister chuan Planning Commission in 12th Plan chhunga Hmarchhak State te mamawh leh hausakna haichhuah tur an neihte bakah hmasawnna kalpui dan tura tul a tihte a sawilang hmasa a. Central sorkarin ‘Look East Policy’ a siamah, inkalpawhna kawngpui Bangladesh, Thailand leh Myanmar te nen siam a tul thute, power tam zawk siam chhuah huna Bangladesh-a thawnchhuah anih theih dan tur leh tul dang tam tak Planning Commission in ngaihdan a neihte a tarlang a. Chief Minister chuan 11th Plan in mi zawng zawngin hmasawnna rah an hmuh theih nana a thupui ‘inclusive growth’ tih chu 12th Plan ah chuan a aia tam zawkin tiin, ‘more inclusive growth’ chu thupui ber tur a ni a ti.

Chief Minister chuan engtinnge 12th Plan hmachhawn tur hian kan inbuatsaih ang tiin, kan hna kalpuite chu endik theih leh hlawhtlinpui theih ngei anih theih nan, kum chanve ah ennawn nise a ti a. Hmasawnna ruhrel siam chu ngaihpawimawh hmasak ber a ni reng ang a ti a. Vantlang mipui hriselna lam tih hmasawnna chu uar zawka kalpui tum a ni a, thiamna chherchhuah, skilled development ngaihpawimawh a ni bawk ang a ti.Central flagship programme thenkhat, NRHM, SSA leh RMSA te tangkai zawka kal chhohpui a ni ang a ti bawk a. A bul berah chuan mipuite hma ngai chunga plan kan siam hi a ngai a ni a ti. Look East Policy tih hlawhtlin nan Kaladan Multi Modal Transport Project kalpui tan mek hi a puitlin ngei theih nan thurawn tha sorkarah pe zel turin mi zawng zawng a sawm bawk a ni.

12th Plan hman tur sawihonaah hian kum 5 lokal tura department tin ten enge tul leh thaa an hriat, engtia kal chhoh tur nge tia an ngaihdan leh duhdante zalen taka inhrilhhriat tawn nana buatsaih a ni a. Hengte bakah hian 12th Plan strategy leh objective a Mizoramin engtinnge kan lo tih ve ang tihte sawihona a ni. 12th Five Year Plan chhunga Mizoram sorkarin a ngaih pawimawh zual sector 6 a thlante chu Agriculture & Allied and Irrigation, Infrastucture - hmasawnna ruhrel pawimawh kawngpui leh Power te, Healthcare - Hriselna lam te, Education, Micro Industries & Sericulture leh Rural Development te an ni.

Sawihonaah hian Ministers, Parliamentary Secretaries, Planning Board Vice Chairman, Planning Board Member & Secretary leh Mizoram University & ICFAI University atanga mithiamte bakah sorkar official mi pawimawh tak takte an tel a ni.