Vawiin chawhma dar 11.30 atang khan ni 13.1.2012 thleng awh tur State Module of Centralised Public Grievances Redressal and Monitoring System (CPGRAMS) chungchang inzirtirna chu New Secretariat Conference Hall, Khatla-ah neih tan a ni a. He training hi Information & Communication Technology Mnister Pu Zodintluanga chuan a hawng.

Pu Zodintluanga chuan, “Sawrkarin mipuite hmasawnna tura hna a thawh reng rengin mipuite lungawina te, an pawmthiam dan tur leh hriatthiam dan turte a ngai pawimawhber thin a. He training chhunga kan thil zir hi mipuiten lungawilohna an neih changa an zualko dan tur leh a chinfel dan tur a nih avangin Department hotulu zawng zawngten kan bel a ngai hle a ni” a ti. Mipuiten lungawilohna an thlen dan tur mumal tak Central sawrkarin Central Public Grievances Commission din a tum thu leh Right to Grievance Redress Bill 2011 pawh siam a tum thu Minister Pu Zodintluanga chuan a sawi lang a; tuna CPGRAMS hman mek pawh Mizoram sawrkar chuan mipuite sawrkar a nih ang ngei a hman ve duhna rilru nen training hi a buatsaih a ni a ti bawk. Pu Zodintluanga chuan, “ Mizoram sawrkar pawhin mipuite lungawilohna thlenna tur dan hi chak takin a bawhzui zel a; Food, Civil Supplies & Consumer Affairs Department chu a hmang hmasaber an ni a; kum 2011 atang khan chak lehzuala kalpui a nih theihnan DP&AR hnuaiah Good Governance Cell din a nit a nghe nghe a ni” a ti.

Ni 4 awh tur he training-ah hian District 8 a DC te leh Head of Department te an tel tha hle a; Central sawrkar atangin training pe turin Pu Badri Prasad, Dy. Director, Ministry of Personnel & Public Grievances & Pensions te; Pu Alfred Kirubakaran, Technical Director, NIC Hqrs. te leh Pu JP Gupta, Scientist C, NIC Hqrs te an lokal a ni.