Vawiin chhun dar 11:00am khan Chief Secretary Committee Room, New Secretariat Complex-ah 12th Plan atana Infrastructural Development Plan siam turin Mizoram Sorkar hotu liante an thukhawm a. Meeting hi Chief Secretary Pu Van Hela Pachuau in a kaihruai a, State Planning Board Member Secretary Pu PL Thanga bakah department hrang hrang hotute an tel a ni.

12th Plan atan hian Planning Commission chuan infrastructure development ngaih pawimawh a ni dawn tih thuchhuah siamin a tarlang a. Hemi bawhzui hian Mizoram chhunga infrastructure development kalpui dan tur hrang hrang vawiin hian thlir ho a ni a. District leh rural area te ngaih pawimawh lehzual a nih dawn bakah e-governance uar leh zuala kalpui tum a ni a. Department hrang hrang te chu Central Scheme hnuaia hna an thawh dan dinhmun mipui hmuh theiha tarlang turin hriattir an ni. Heng bakah hian Mizoram Sorkara department hrang hrangte chu Plan Budget hnuaia Sorkar hnathawkte hlawh mamawh zat te, DoNER leh NEC hnuaia project hrang hrang atana sum mamawh zat tur leh Concept paper te, Utilization Certificate leh 12th Plan hnuaia infrastructure development atana mamawh hrang hrang te chu 8th April, 2011 hmaa theh lut vek tura ngen leh hriattir an ni bawk a ni.