Lai Autonomous hnuaia Village Councils Inthlanpui chu ni 25.3.2014 khan tluang taka neih zawh a ni ta. Village Council 93 awma 85-a inthlang tura ruahmanna siam a nih lain 63-Tuisentlang Village Council Constituency-ah Independent candidate ten vote thlak tan hma maiah an bawm khar ni a an insawi avangin vote thlak an awm lova, Village Council 84-ah inthlanna hi neih a ni ta a ni. He Village Council inthlanpui neihna khua 84-a voters 43,490 awmah voters 33,445 in vote an thlak a. A pumpuia Voter turn-out percentage chu 76.90% a ni.

Vote thlak that berna khua hi 100% tlakna Kakichhuah a ni a, Voter 154 awmah 154 in vote an thlak a ni. Vote tlak chhiatna ber chu Archhuang khua a ni a, he khuaah hian 18.58% chauh vote a tla thung a ni. A pumpuia Vote thlaktute zinga upa ber chu Upa Thanthiaua S/o Hniarhmunga (L), Thaltlang Khua, Kum 115 a upa a ni.

Vote tla te hi ni 12.4.2014-a chhiar chauh tur a nih avangin Ballot Box zawng zawngte hi Lawngtlai-a Storage Centre – BNRGSK Hall-ah phurhkhawm vek a ni a, Polled Ballot Box hnuhnung ber chuan ni 26.3.2014 zing dar 9:00 a.m. vel khan Storage Centre, Lawngtlai a thleng a ni. Vote chhiar dan tur leh chhiarna hmun tur chungchang erawh chu Commission-in ruahmanna a la siam dawn a ni.

He inthlanpuiah hian harsatna liantham thleng engmah a awm lova, vote thlak chungchang bakah dan leh thupek kenkawh kawngah leh inbiak pawhna lamah pawh District Election Official-te, Election Observers, Sector Officers, Returning Officers, Polling Officials, District Police, MPRO, Political party-te leh NGO, a bik takin Young Lai Association (YLA) te inpekna leh thahnemngaihna avangin a felfaiin a muanawm hle a ni. Hemi avang hian SEC chuan he inthlanpui tluang taka neih a nih theina atana mawhphurtu zawng zawngte chungah lawmthu a sawi tak meuh meuh a ni.