4511/2024-2025

Dated Aizawl: the 03 March 2025 : Nimin khan, tun hnaia Lucknow-a neih zawh tak 13th National Para-Judo Championship-a Mizoram ai awh leh Gold Medalist ni bawk Tv. David Lalremruata chu Mizoram Blind Association, Mizoram Judo Association leh a khaw chhuahna West Serzawl khawtlang hruaitute chuan Lengpui Airport-ah an lo hmuak.

Hmuahna hunah hian Mizoram BLind Association President, Tv. Ramthachunga leh hruaitu dangte, Mizoram Judo Association President Pu Ronnie Rosanga Varte leh hruaitu dangte bakah West Serzawl khawtlang hruaitu leh Tv. David Lalremruata  duhsaktute thahnem tak an tel a ni.

13th National Para-Judo CHampionship-ah hian Tv. David Lalremruata hi Blind Category KG -81 huangah a inlan a, a khingpui zawng zawng a 'Knock-out' vek a ni.

Tlangval David-a hi, member a nihna Mizoram Blind Association te, duhsak taka amah chhawmdawltu Mizoram Judo Association leh a khua West Serzawl khawtlangte chuan March Ni 5, 2025 (Nilaini) hian a lawmna pui zawk chu an buatsaihsak dawn a ni.