159 Bn. Border Security Force, Dawngzawl, Serchhip chuan nimin ni 15^th January, 2019 khan Keitum ah Civic Action Programme hawnna hun an hmang a, Keitum khawtlang tan infiamna hmanrua hlanin, nungcha leh ramngawte humhalhna Campaign an buatsaih nghal bawk.

159 Battalion BSF te hian ram mipuite nena inunauna leh thawh hona tha zawk a awm theih nan Civic Action Programme hi an buatsaih niin; he hunah hian infiamna lama Keitum thlaite hman tur Boxing, Badminton, Football leh Volleyball hmanrua eng emaw zat an pe a. Hmeichhe naupang leh mipa naupangte tan Boxing zirna kalpui turin ruahmanna an siamin, National Games-a Medal lo hlawh chhuak tawh ten zirtirna an pe dawn ani. Keitum khawtlang bakah hian Tlabung ah pawh training hi neihpui tura hmalak a ni bawk ang.

He hunah hian Shri Vinay Yadav, Commandant chuan thalaite leh kum naupang zawkten infiamna lama theihna an neih te haichhuah sak a, inphochhuahna hun tha siam sak a pawimawh zia sawiin; Mizo thaiten Boxingah ah theihna tam tak an nei tih hi a chiang hle a, mumal taka coaching inpek uar chhoh zel a pawimawh hle a ni, a ti.

He hunah hian nungcha humhalhna inzirtirna atan poster campaign neih nghal a ni bawk a. Commandant chuan thalaite chu sava leh nungchate humhalh tlat a, vawnghim tlattu ni turin a ngen a ni. Mizoram State bird Vavu thlalak leh Sava leh nungcha dang thlalak poster chu khawchhung hmun pawimawh laia an tar turin khawtlang hruaitute hnenah an hlan nghe nghe a ni.

He hunah hian Dr. L. Pachuau, Deputy Commandant, Shri S. Mondal, Deputy Commandant leh Keitum VCP bakah khawtlang hruaitute an tel a ni.