Mizoram AH & Vety Minister Dr K. Beichhua chuan tukin zingkar khan Lawngtlai District-a Mampui Vety Farm a tlawh a, Farm enkawl zui zel dan tur a enfiah.

Minister hian Mampui Vety Farm a tlawh hmain, Lawngtlaia Veterinary Hospital sak tur a en hmasa a. He Vety Hospital sakna tur hi RIDF (NABARD) atangin sum Rs. Nuai 85 hmuh a ni a. A sa tur contractor pawh thlan fel tawh niin, rei lo teah hna tan tawh tur a ni.

Minister Dr K. Beichhua'n Mampui AH & Vety Farm a tlawh hian Lawngtlai Dist AH & Vety Officer Dr B. Zonghinga, Chief Veterinary Officer Dr Vanlalhruaia leh thawktu dangte'n lo dawngsawngin, vawk note thar chhuahna Piglet Multiplication Centre-a vawk vulh mek a en nghal a. Tuna vawk an vulh mekte chuan nikum 2018 March thla atang khan vawk natna hri PRRS an vei vek avangin, enkawl zui zel dan tur department hotute nen an sawi ho nghal a. Tuna an vawk vulh mekte chu dam chhuak tawh tho mah se, no hrisel an hrin theih tawh dawn loh avangin raitir leh chi an ni tawh lo va, ei atan erawh a hlauhawm loh thu tar lan niin, an chhul leh til lak vek ni se, chumi hnuah talh tura vulh thau a, tihral vek ni se, an ti a. Vawk in zawng zawng pawh disinfectant hmanga tihthianghlim vek hnu, thla hnih ral hnuah vawk note tha zawk dah thar leh ni se, an ti bawk.

Vawk natna hri chungchangah hian AH & Vety Minister Dr K. Beichhua chuan vawk natna PRRS hian min la chen chilh mek a, hemi tirem a, tibo hmak tur chuan ram pawn atanga vawk lak luh khap hi a kawng awm chhun a nih rih thu leh January ni 8 khan District tina Deputy Commissioner-te hnenah ram pawn atanga vawk lak luh khapna thupek chhuah vek tura a hriattir tawh thu sawiin, mipuite pawhin sawrkar thuchhuak chu zawm a, sawrkar tawiawm theuh turin a ngen nghal.

Minister hian Calf Rearing Centre-a bawng vulh mek leh artui awp keuna Poultry Hatchery pawh a tlawh nghal a. He poultry hatchery-ah hian khawl hmangin tum khatah artui 5000 a keutir theih dawn a. Tun dinhmunah power supply a that tawk loh avangin a nih dan tur angin hna a la thawk thei lo va, chu vangin Minister chuan power supply hnianghnar leh tha zawk thlun zawm dan tur ngaihtuah ni se, a ti a. Lawngtlai leh Siaha District tana ar note mamawh angte phuhru thei turin poultry hatchery chu enkawl zui a nih tur thu a sawi bawk.

Minister hi Lawngtlai East bialtu MLA Pu H. Biakzaua bakah, Aizawl atangin party hruaitu leh official-te, Lawngtlai atangin LADC-a Executive Member leh MDC eng emaw zat leh party hruaitute leh official thenkhatte'n an tawiawm a ni.