Vawiin khan Lawngtlai District Chess Association (LDCA) buatsaih 15th Deputy Commissioner Running Trophy Chess Championship 2017 chu Lawngtlai Electric Venga District Sports Centre-ah Lawngtlai Bawrhsap Dr A. Muthamma IAS chuan a hawng.

Lawngtlai DC chuan LDCA-in DC Trophy Chess hlawhtling taka a buatsaih thei thin chu lawmawm a tih thu sawiin, chess chu thluak sawizawi nan leh rilru tihhrisel nana infiamna tha ber a nih thu a sawi a. Harsatna khirhkhan tak tak pal tlang dan zirna leh hmanlai lalte paw'n ral rel nana an hman thin a ni tiin, a thahrui ngah zawk ni kher lovin, rilru fim leh huaisen taka beitu zawk chuan hnehna a chang thin a ni, a ti. Chess chu a tuipui tawh sa mi tlem te chauhvin an khelh chu duh tawk mai lovin, naupang zawkte paw'n an ngainat theih nan Lawngtlai District chhungah vawrh lar zel ni se, a duh thu a sawi bawk.

He hun hi LDCA Vice President Pu C. Vanlalruata'n kaihruaiin, player-te lawmna thu a sawi a. Lawngtlai DC-in sate var (white pawn) chu F2 atang F4-a a sawn hnuah, inkhelh chhunzawm nghal a ni.

He inelna hi ni hnih awh tur niin, a tel tur mi 30 chuang an inziak lut a. Sr National Arbiter Tv Ricky Lairamdina kaihhruaina hnuaiah an khel dawn a ni. Inkhelhnaah hian movement record leh chess clock hman a ni a. Lawmmanah pakhatnain Rs 5,000/- leh trophy, pahnihnain Rs 3,000/-, pathumnain Rs 2,000/-, palina atanga parukna thleng Rs 500 theuh leh pasarihna atanga sawmna chinin Rs 300/- theuh an dawng dawn a ni.

Vawiina Lawngtlai DC Trophy Chess Championship hawnnaah hian Lawngtlai DC chu Lawngtlai Addl DC Pu H. Dolianbuaia MCS chuan a tawiawm a ni.