Nimin khan  Pu John Rotluangliana Minister Food & Civil Supply, Transport, Tourism Bialtu MLA ni bawk chuan a bial chhung khaw hrang hrang, N. Sabual, Vawngawnzo, Damdiai leh Suarhliap khua te a tlawh.

Heng khaw hrang hrang a tlawhna-ah hian amah lo lawmtu bial mipuite leh khawtlang hruaitute nen inkawmhona neih  niin Bial mipuiten an mamawh hrang hrang an lo thlen te a ngaihthlaksak a. MLA Fund atangin  N. Sabual Sub Centre sak that nan Rs 30000( singthum), Vawngawnzo Playground tihzauh nan Rs 1,00,000/- ( nuaikhat) ,  Damdiai Bazar shed sak nan Rs 100000/- ( nuai khat)  leh Suarhliap vantlang zunin pahnih sakna turin Rs 50000/-  Bialtu MLA hian a pe a ni. Suarhliap Middle School tlawhin thawktuten school mamawh hrang hrang an lo thlen  chu a theih ang anga tihhlawhtlin tum a ni a ti.

Bialtu MLA hian bialchhung mipuite, a  damloh chhung zawnga amah lo tawngtai saktute chungah lawmthu a sawi a, ram leh khawtlang tana mi rinawm tak ni a, thawkho zel turin a sawm a ni.

Transport Minister hian  Tlawng lei Bairabi dawhzawh tawh chu tlawh nghalin Lei panna kawng dinhmun te a hmunah a enfiah nghal a. Khawtlang mipuite hnenah fur zualpui a reh veleh kawng siamtha tur contractor pawh thlan fel ni tawhin hna thawh nghal tum a nih thu a sawi. An tlangdung khua chu  motor tlawhpawh ber pawl an nih thuai dawn a vangin rilru zau tak pu chunga hmasawnna in a ken tel thil hrang hrang te lo dawngsawng thiam turin a chah bawk a ni.

Bialchhung mipui tena kan nghahhlelh em em cheng nuaih 5495.00 senga  132 KV Single Circuit Line Bairabi to W. Phaileng via Mamit Km 74 a sei chu NEC in approval a pe tawh a, cheng nuaih 500.00 hman nghal mai theih turin a rawn pe fel tawh a ni a ti. Bairabi to Mamit kawng pawh siamtha tura hmalakna kalpui mek a nih thu  sawiin mipuite pawh lo dawh hram hram turin a chah a ni.

Heng khaw hrang hrang a tlawhna-ah hian khawtlang hruaitute chuan lo dawngsawngin duhsakna an lo hlan a ni. Bialtu MLA hian vawiin hian a bialchhung khua Dampui leh Dapchhuah te a tlawh leh ang.

Pu John Rotluangliana Minister hi Mamit atangin khawtlang hruaitute, Pu Lalramngaia PS leh Pu Paul Rokima, DIPRO ten an tawiawm a ni.

Attachment

  • Loading attachment...