Nizan khan I&PR Auditorium-ah NEDP hnuaia Entrepreneurship Development Scheme(EDS)  hmalakna peng pakhat First Micro Start Up Capital Competition, EDS viltu, Mizoram State Entrepreneurship Development Monitoring Committee (MEDMOC) in a buatsaih ah lawmman dawngtu, entrepreneur nih tum, mi 15 te chawimawina hun chu Chief Minister Pu Lal Thanhawla'n a hmanpui.

Chief Minister Pu Lal Thanhawla chuan sorkar hmalakna ah Miretheite, kuthnathawkte, loneimite, inhlawhfate dinhmun siamthat  leh thalaite tana khawvel thar siam te chu ngaih pawimawh bik a ni a ti a. Kuthnathawktu ten thlamuang taka an mahni kaw buzawl a an nuam tih zawng leh an thawh thiam hmanga  eizawnna ngelnghet  an neih nan NLUP chu kalpui a niin NLUP hmalakna a puih tlak leh chhawmdawl la ngai te pawh New Economic Development Policy(NEDP) hmanga chhawmdawl chhunzawm an ni  ang a. NLUP ti phuisui tur leh a hlawhtlinna sawhnghet tura NEDP duan a ni chu a lawm awm a tih thu a sawi a ni.

NEDP thiltum lianber erawh chu ei tawk tawk dinhmun atanga Market Economy dinhmuna Mizoram  hlankai a ni a tih a sawi a. NEDP ah thalaite an pawimawh dawn tih sawiin thalai thluak a eizawng thei tan hun remchang a ni dawn a ti a. Infiamna khawvelah thalaite  tan khawvel thar siam a ni mek zela; international player tamtak nei tawhin  a hlawhtlinna Mizoram in a hmu tawh a.  Nasa zawkin hmalakna chhunzawm a ni ang; chutih laiin NEDP-ah thalaite tan Mizoram hmasawnna atana  thluak thawhna hun remchang leh ruahmanna tha zawk siamtura  'chona thar' chhawpchhuah a ni a ti. Chief Minister chuan NEDP kaltlanga Market Economy a lawnchho  turin hmabak tam tak a awm tih a sawi a.  Sorkarin mi hausa te pawh rawn tel ve  turin a sawm tawh thu leh  an rawn penchhuah ve hun tur  beiseiin a thlir mek a ni ti.. Chutih rualin thangthar mithiam rual - subject matter specialist tam tak  ram leh hnam tana an theihna hlan duh an rawn pung chho hmuh chu a phurawm in a thlamuan thlak tih a sawi a. Thangthar te tan a khawvel thar siamna kawnga sawrkar hmalakna ah hian entrepreneur te hi an pawimawh telh telh dawn a  ti a.  " A incho chhuak zawng leh a in tanpui zawnga kal hi kan ram hmasawnna tur a ni a. Chona hmachhawn ngam, hlawhtlin tak tak duhna nena tang leh deliver tum ten hna an thawh phawt chuan  hlawhtlina a awm tih MIFCO ah a chiang hle thu sawiin tun hma Mi 80 hnathawk an awm laia hlawhchham kha  tunah hian mi 8 emaw lek thawk tawhin  kan hlawhtling tan a ni" a ti. "Kan ram, Pathian min pek hi, boruak tha ber, hmun nuam ber, thlai leh thei chitin rengin a ngeih em em na a ni a.  A hausakna haichhuak tur erawh chuan a chhunga cheng ten thawhrimna hmanga an zawnchhuah a ngai",  tiin Chief  Minister Pu Lal Thanhawla chuan, " Sum hi a zawn a zawn hmuh tum tur a ni lova; a thawh a thawh chhuah zawk tur a ni", a ti.

Entrepreneur te fuihna thusawiin hlawhtlin theihna tur kawng tam takah Zoram thalai, mithiam leh a ngaihna hria tan Mizoramah a awm a. "Hlawhtling te pawh engtin nge kan tih hlawhtlin leh zual ang tih ngaihtuah thleng khan kan entrepreneurs te kutah a awm dawn a ni". Ram in hmasawnna kawnga ke pen tura thutlukna a siam reng rengin entrepreneur te an pawimawh hle thin tih Chief Minister chuan a sawi a. "Mizoram hlawhtlinna tura thalai tam tak phur taka in rawn penchhuak hi a lawmawm a.  Kan intihphur tawn a ngai a; chuti lochuan mahni ringawt a phur hi a sawt thin lo a ni", a ti.

Thusawitu dang Planning Minister Pu Lalsawta chuan "Loneitu, kuthnathawktu ten thawhchhuah an neih ang ang hi Market-ah awmze neia a thlen a ngai a.  Vawiinah hian kan hmuh angin kawngsira thutpui tur bak hi a awm mang lova. Sawrkarin a ngaihtuah dan chuan loneitu, kuthnathawkmi ten eizawnna ngelghet an hnathawhna kumtluana phur taka thawk chunga an hmuh kan duh ber a. Retheihna hi hnathawh hmanga um bo theih a ni a. Heng zawng zawng a tan hian NEDP hi siam a ni", a ti. Mithiam Mizoram tam tak rawn theih an awm tawh avanga NEDP kalpui chu a huphurhawm loh thu sawiin thiamna sang leh a ngaihna hria, kum 15 liamta ngaihtuah kha chuan Mizoram in a nei tawhin a  intodelh tawh a ni a ti. " Kan unaute thingtlanga kuthnathawka eizawng te intodelh leh eizawnna ngialnghet an neih hi kan duh ber a ni", a ti bawk.

NEDP hnuaia Entrepreneurship Development Scheme(EDS)  hmalakna peng pakhat First Micro Start Up Capital Competition hi mipui nawlpui hriatthiam dan tur chun sum senso liantham lutuk lova sumdawnna thila hna thawhtur siam zawnga bultan dan tur in ruahman siak a ni ber a.  He intihsiakna tel mi 32 rawtna atangin  ruahmanna tha zual 15 thlan chhuah a ni a. An intihsiakna sector te chu - Agri Marketing, Urban Mobility leh Solid Waste Management a ni a. Heng ruahmanna siamtute hian a taka hna an tan hunah tanpuina sum, Cheng Nuai 5 emaw an project senso pum pui zahve,  pek tur niin kaihruaina hnuaia an hmalakna te pawh uluk taka vil an ni ang.  

Chief Minister  kut atanga Micro Start Up Competition under NEDP-EDS titha lawmman dawngtu te chu   Agri-Business Soulution atangin 1.Andy Lalhmachhuana, Khatla- Poultry Farm,2. F.Lalrawngbawla, Venghlui - Systemic Marketing of Agriculture Products, 3.H.Lianchungnunga, Sangau - NDM Grocery, 4.H.Zorempuia, Sihphir Venghlun - Mizoram Food Processing Industry- Ginger, 5. K.Thanzami, Kawngveng, Bilkhawthlir - Preservation and marketing of  arecanut, 6.Lalsiamthara, Bazar Veng Serchhip -Changel paper Industry, 7.Melvyn Vanlalhlimpuia, Edenthar- Sacha Inchi Tea Leaf Drying Project, 8. PB Lalnuntluanga, Thuampui -Making of Bio-degradable items, 9. PB Lalrinfela, Thuampui - Chilli Processing Industry, 10.PC.Lalawmpuii , Chaltlang - marketing of Hygienically dehydrated vegetables of Mizoram 11. Zosangzeli Chhakchhuak, Electric veng - Hill Produce Mobile Market  Solid to Waste energy Sector ah 12.Lalawmpuia, Kulikawn -Opee Paver Block, 13. Laldinthara, Ramhlun North - Genereation Electricity from Waste, 14. Rozampuia, Dawrpui Vengthar - Phonenix Recycling Factory, leh Urban Transport Sector ah 15. Mark Lalduhsaka, Tuikual South - Mobile Applications for Public Transport te an ni.

Micro Start Up Competition under NEDP-EDS titha lawmman semna hunah hian Planning Minister Pu Lalsawta chu khualzahawm a ni a. Planning Secretary Dr. Vanlalramsanga, Alternate Chairman, MEDMOC chuan lawmman semna hun leh EDS thiltum tlangpui sawina a nei hmasa a. Hemi hnu hian Chief Minister in lawmman an sem a; lawmman dawngtute chanchin leh a thil tum te lanna video tawi thlirho nghal a ni.