3379/2024-2025

Dated Hnahthial, the 5th December, 2024: Vawiin khan Hnahthial DC Conference Hall-ah District Hub for Empowerment of Women (DHEW) leh One Stop Centre, Women and Child Development, Hnahthial tangkawpin a an buatsaih "16 Days Global Awareness Campaign on Ending Gender Based Violence" kharna hun hman niin Human Rights Day lawmna hun hman nghal bawk a ni a. He hun hi Hnahthial Bawrhsap Pi Rita Lalnunmawii Pachuau chuan khuallian niin a hmanpui.

He hun hi Pi Lalrinpuii, District Mission Coordinator, DHEW, chuan kaihruaiin Bawrhsap hnen atangin thusawi ngaihthlak a ni a. Hmeichhiate laka hleilenna campaign kharna ni leh Mihringte dikna chanvo lawmna ni a ruala hman khawp a ni hi thil inrem tak anih thu a sawi a. Human Rights chuan mihring kan nihna anga dikna chanvo kan neihte kan hmu tur a ni tih chu a thupui anih thu sawiin chutiang chiah chuan Ending Gender Based Violence Campaign thil tum lian ber chu hmeichhiaten an dikna chanvo an chan ve theih chu a ni a ti a. Hmeichhiate chunga hleilenna hi a tam thu sawiin lei rem an rah ve theih nan tan lak nasat a tul thu a sawi a. Mizoram chu India ram state dang ngaihtuah chuan hmeichhiate dinhmun chu ziaawm viauin lang mah se rolrelna hmun sang ber, Assembly house-ah thu an awm mang lo chuan hmeichhiate dinhmun a tilangchiang a ni a ti a. Hmeichhiaten aw an chhuah theih nan leh zau zawka an hmeichhe puite an puih theihn chu Assembly house-ah anih thu sawiin chumi avang chuan hmeichhe tam zawk politics ah an luh a tul thu sawi a. Village Council a hmeichhiate tana reservation awmah pawh ding tur an hmu zo lo thin chu thil pawi tak anih thu sawiin hmeichhiate pawh hemi kawngah tan lak a ngai a ni a ti bawk. 

Hnahthial District chhunga Women and Child Development hmalakna chu fakawm a tih thu sawiin chak taka hma la zel turin a fuih a. Chumi anih rual chuan Hnahthial district MzSRLM te chuan district dang an la phak chiah loh thu sawiin tan la lehzual turin a chah a ni. Sum leh pai a intodelhna, financial independence atang hian hmeichhiate chawikanna (Women Empowerment) chu a in tan a ni tiin chumi avang tak chuan Self Help Group (SHG) chu an pawimawh takzet a ni a ti a. SHG chu hmeichhia, a bikin nu ho chuan tangrualin mahni inkhaichhuah nan hmang se a duh thu sawi bawk a ni.

16 Days Global Awareness Campaign on Ending Gender Based Violence hnuaia hmalakna report chu Pi Teresa Lalhruaitluangi, Centre Administrator, OSC hnen atanga ngaihthlak a ni a. 

1. November ni 12 khan he awareness campaign banner hi HDFA Turf ground-ah Inter Departmental Sports neih naah pawh pharh a ni. 

2. November ni 14 khan he campaign pual hian Thiltlang YMA, mipuite leh One Stop Centre( OSC) te nen hun hman niin mi 130 vel an tel a. Gender Sensitization  programme, DHEW te buatsaih chu Thiltlang YMA te nen tangkawpin neih a ni bawk a ni. 

3. November ni 23 khan OSC leh DHEW tangkawpin Awareness on Gender Based Violence tih thupui hmangin BCM Peniel BKHP te nen hun an hmang a. Mi 80 vel an kal a ni.

4. December ni 1 khan OSC ten Pangzawl BKHP te hnenah he campaign chungchang hrilhhriatna hun an hmang bawk a ni.

GBV Global Awareness Campaign pual hian Poster Making Competition buatsaih niin poster 65 vel a lut a. He hunah hian Pu Lalramnghaka Hrahsel, Gender Specialist, DHEW kaihhruaiin Poster Making Competition lawmman semna neih nghal niin heng tarlan te hi lawmman dawngtute chu an ni:

1st Prize: Lalhmangaihtluanga, Model Veng, Hnahthial 

2nd Prize : Lalhrilmawia, Pangzawl

3rd Prize: C. Rodingliana, Peniel Veng, Hnahthial 

Consolation prize:

1. Johan VL Hruaitluanga

2. TC Lalneihpuia

3. Andrew Lalfakawma

4. T. Lalsangzela

5. FH Lalnunthari

Hei bakah hian kut ziak (hand drawn) poster theh luttu, Maruata Boitlung hnenah Special Prize hlan bawk a ni.

Gianna Ropekhlui, Pangzawl hnen atangin 'I dawn ngai em' tih thupui hmangin recitation ngaihthlak a ni a. He hun hi Pi LT Rose Mary Hnamte, CDPO chuan lawmthu sawiina in a khar a ni.