Vawiin chawhma dar 9:30 khan 166 Battalion BSF Headquarters Dawngzawl, Serchhip te chuan a mamawh apiangte hman turin thisen an pe.

Vawiina thisen pek runpui an Battalion Headquarters Dawngzawla neih hi Dr. Lalrozama, IAS District Bawrhsap chuan hmanpuiin, Officer leh sipai zawng zawngte duhsakna a hlan a; thisen petu te thilpek a hlan a ni. Pu S.H Suresh Kumar, Commandant chuan khuallianin a hun hlu tak a rawn pek avangin lawmthu a sawi a, sipai ho zawng zawng aiawhin thilpek a hlan ve bawk a ni.

BSF thisen pek runpuiah hian JN Hospital Serchhip atangin Dr. Maria VL Rosangi, Blood Bank Officer leh thawktuten a hmunah kalchilhin thisen hi an laksak a, sipaite hian thisen Unit 30 an pe a 166 Battalion BSF hi Battalion thar niin BSF kum 50 tlin lawmna atana din a ni a, April 2015 atang khan Dawngzawl, Serchhipah hian awmhmun an khuar tan a, he battalionah hian mi 1200 vel awmin, Company 6 ah an in sem darh a, Mizoram chhim lam Indo-Bangladesh ramri venghim turin an awm a ni.