Champhai AH&Vety Office chuan Champhai District chhunga NLUP 2nd Phase hnuaia ar vulh thlangtute hnenah Final Installment tanpuina sem hna an kalpui mek. 2nd Phase-ah hian Champhai District chhungah ar vulh thlangtu mi 759 awmin, final installment-ah hian beneficiary tin in Rs. 44,400 an dawn chu ar chaw leina, land development leh damdawi man atan a hman tura pek an ni.

NLUP tanpuina hi Distribution Centre paruk atangin semchhuah a ni dawn a. Ni 21.11.2015 khan Champhai Centre atangin beneficiary 404 hnenah semchhuah tawh niin, vawiin khan Khawzawl Centre atangin beneficiary 205 hnenah sem a ni a. Hnahlan Centre atangin naktuk (24.11.2015) hian semchhuah a ni ang a, Khuangleng Centre-ah ni 25.11.2015 ah sem niin Khawbung Centre leh Ngopa Centre atangin ni 26.11.2015 ah semchuah a ni ang.