3071/2024-2025

Dated Aizawl, the 19th November 2024: Vawiin khan Chief Minister Pu Lalduhoma, Finance Minister ni bawk hovin 16th Finance Commission hnena thlen tur Mizoram sawrkar rawtna leh ruahmanna sawihona CM Conference Hall ah neih a ni.

Chief Minister chuan, tun tumah hian 16th Finance Commission hun chhunga state specific grant lam kan sawiho bik dawn a. Tun hmaa he specific grant lo kalpui tawh dan ang thova rawn kal tur a nih hmel avangin sum hmuh beisei a tam thei hmel lo va. Department hrang hrangten project in rawn thehluh hi kan thun vek thei dawn lo tih kan hriat a ngai. Kan sum dawn theih tur awm tawka kan ngaih behchhanin kan mamawh zual chauh kan thlan a ngai dawn a ni, a ti.

Pu Vanlaldina Fanai, Commissioner, Finance chuan meeting an koh chhan tlangpui a sawifiah a, "Vawiinah hian official bik kan inko khawm a. Hun remchang hmasa berah kan NGO te nena inkawmna buatsaih leh kan tum," tiin an ruahmanna a tarlang.

Meeting hian 16th Finance Commission hun chhunga state specific grant hmanga thawh tura department te project thehluh enho a ni a, project thehluh thenkhat tun tuma la tarlan loh te chu a ranglama enho leh ni se, an ti. Hei bakah hian 16th Finance Commission ten Mizoram an rawn tlawh huna lo dawnsawn dan tur pawh an sawi bawk.

Finance Commission hi kum nga chhunga sawrkar laipui leh state sawrkar ten tax an insem dan tur bithliahtu atana India danpui Article 280 anga din a ni a. 15th Finance Commission huam chin hi a tawp mai tawh dawn a, April ni 1, 2026 atang khian 16th Finance Commission rawtna anga kal tawh tur a ni.

15th Finance Commission hun, kum nga kal ta chhunga Mizoram sum hmuh Revenue Receipts zaa 42 hi Government of India Grant in Aid atanga dawn a ni a, a dang zaa 42 chu share of tax atanga hmuh niin, a la bang zawng chu own tax revenue zaa 9 leh own non tax revenue atangin zaa 7 te an ni.

Government of India Grant in Aid huang (component) atanga kan dawn hi CSS leh Finance Commission grant te zaa 47 ve ve an ni a, a bang zaa 6 hi kawng dang atanga grant hmuh a ni. 15th Finance Commission-in share of tax-a state share atana a bituk chu zaa 41 a ni.

Meetingah hian Pu TBC Lalvenchhunga, Adviser to CM (Planning & Finance) bakah State Specific Grant atana project thehlut department changtu Minister te leh officials pawimawh te, Planning & Programme Implementation leh Finance official pawimawh te an tel a ni.