4420/2024-2025

Dated Aizawl: the 25th February 2025: 16^th Finance Commission member ten vawiin khan Zoram Medical College & Hospital (ZMCH), Falkawn-a mi chu an tlawh a, Health & Family Welfare Minister Pi Lalrinpuii leh Pi Sangchhin Chinzah, H&FW Secretary bakah ZMCH hotuten an lo dawngsawng a ni.

ZMCH Academic Block a Council Roomah inkawmhona neih a ni a, hetah hian ZMCH Director Dr John Zohmingthanga’n presentation pe in ZMCH lo indin tan dan atanga tun dinhmun an thlen chin te, hmasawnna tur la awm leh an mamawh chi hrang hrangte tarlangin, Health Minister Pi Lalrinpuii pawhin 16^th Finance Commission chungah beiseina sang tak an neih thu a sawi a, ZMCH bakah Health & Family Welfare Deparment kaihhnawih thil pawimawh tak tak an hnena an thlente chu Mizoram hmasawnna atana pawimawh ber berte an nih avanga ngaih pawimawh sak tur leh a tihhlawhtlin dan kawng ngaihtuahsak turin a ngen bawk a ni.

Inkawmhona an neih zawh hian 16^th Finance Commission member te chuan ZMCH fang kualin OPD, Laboratory leh Deparment hrang hrang an tlawh a, ZMCH hotute pawhin an dinhmun leh hmasawn theihna tur la awm ang angte a hmunah an hrilfiah nghal zel a ni.

ZMCH an tlawh hnu hian 16^th Finance Commission memberte chuan Falkawn Bharat Nirman Rajeev Gandhi Sewa Kendra (BNRGSK) Hall-ah Falkawn Village Council hotute an kawm a, hetah hian 16^th Finance Commission Chairman Dr. Arvind Panagariya chuan hovin LAD Director Pu Chauhnuna leh Falkawn Village Council member ten an lo dawngsawng a ni.

Falkawn Village Council hotute chuan Mizorama Village Council 800 chuang awm zingah an hun chep tak kara tlawh tura anni an rawn thlang chu Commission chungah an lawmthu an sawi a, Village Council inrelbawlna kalphungte sawifiahin an lo tawnhriat tawh atangin Mizoram pum huapa Village Councilte mamawh leh hmasawnna tur bakah hmalak dan thar tur atana tha ni a an hriatte 16^th Finance Commission hnenah hian an thlen a, sawihona hun tha takin an hmang bawk a ni.