16th North Eastern States FIDE Rating Chess Championship 2016, ni 18 - 23 January 2016 chhunga Electric Veng YMA Hall a neih chu vawiin chawhnu dar 2:30 khan Health Minister Pu Lal Thanzara'n a khar.

Thu sawiin Minister Pu Lal Thanzara chuan Chess inkhelhna chu mihring finna, rilru leh ngaihtuahna hman nasat ngai leh nitin nunkawng atan pawha thil tangkai tan a nih thu te a tarlang a. Khawvel huapa ranking siamtu FIDE te nena Mizoram Chess Association-in tournament ropui leh hautak, hlawhtling taka an buatsaih thei chu lawmthu a hrilh bawk.  Ram changkang tehna chu inkalpawhna leh kawlphetha te a nih rualin ram changkang apiang infiamna lamah an changkang bawk tih sawiin Mizo thalaite pawhin remna leh muanna kara nasa taka infiamna chi hrang hrang hmanga hma an sawn chho chu ropui a tih thu te a sawilang bawk. Lawmman dawngte a lawmpui thu sawiin hlawhtling lo te pawhin nasa lehzuala tan lak thar nan inelna chu hmang tangkai theuh turin a chah bawk.

16th North Eastern States FIDE Rating Chess Championship kharna ah hian FIDE Vice President Pu D.V. Sunder leh AICF CEO Pu Bharat Singh Chauhan ten thusawina hun an hmang bawk a, Mizoram ah FIDE Rating Chess Championship hlawhtling taka hman a ni thei chu lawmawm tiin Mizo chess players ten hman an sawn chak thu te an tarlang bawk.

16th North Eastern States FIDE Rating Chess Championship ah hian hmarchhak state 7 atangin player 123 an tel a, Mizoram player zinga lawmman pakhatna la te chu heng te hi an ni :-

1. Under 13 Boys - Lalruatdika

2. Under 15 Boys - Lalremruata

3. Under 15 Girls - L.H. Zothanmawii

Puitling category ah a titha ber 20 zingah Mizo player 13 an tling a, a titha ber pathum te chu hengte hi an ni :-

1. Santunu Borpatra Gohain - Assam

2. Singh Soram Rahul - Assam

3. Zohmingliana - Mizoram

Lawmman te hi Minister leh FIDE leh AICF hotu ten an sem a ni.