Mizoram Chief Minister Pu Lal Thanhawla chuan vawiin chawhma dar 11:00 khan Serchhip AOC Veng a School Education Department ramah Educational Complex sakna tur lungphum a phum a, Education Minister Pu H.Rohluna, Pu Joseph Lalhimpuia, Parliamentary Secretary, Pu P.Lalchhuanga, IAS, Secretary, Education Department, Pu K.Lalthawmmawia, IAS, Director, School Education Department ten Chief  Minister hi an tawiawm a ni.

Educational Complex sakna tur lungphum phum anih hnu a Serchhip Town Hall-a vantlang inkhawm ah Chief Minister chuan thu sawiin Educational Complex sak tur chu Serchhip bial mipui tan mai bakah Serchhip District leh Mizoram tan malsawmna thlen tu anih ngei theih nan duhsakna a hlan a; mizo hnam zia milpui leh tunlai boruak mil bawk si a zirna kalpui anih a, eizawnna tlak thiamna bik nei zirlai chherchhuah an nih theih nan Education Reforms Commission (ERC) hial an din tawh thu te,  ERC recommendations pawh Mizorama kan mithiam neih ten uluk taka an zir thu leh kan hnam ze mil leh that pui dan ber tura ruahmanna an siam chhuah thu sawiin a tihhlawhtlinna atana sum mamawh a tam tham avangin Sawrkar Laipui ah thlen a ni a, Central Sawrkar inthlak avang leh Planning Commission thiah anih tak thut avangin tunah hian NITI Aayog ah thlen turin hma lak mek a ni a ti bawk.

Chief Minister chuan zirtirtute chu naupangte entawntlak "role model' an nih a pawimawhzia hre thar tura chahin zirlaibu piah lamah naupangte chu faina kawngahte, insumtheihna kawngahte, mimal nunphung hmasawnna kawngah te entawntlaka an awm a ngai a, nauoangte nun a ze nghet tuh tura theihtawp an chhuah a pawimawh thu a sawi a, mizote hi thu leh hla ah kan sang em em a, chutih rualin a bik takin tunlai hian kan tawngkam hman dan leh ziak danah a diklo kan hmang nasa em em tawh a ni a ti a, hei hi zirtirtu te pawhin vei se a duh thu leh an zirlai te hnenah ziak leh tawng dan dik zirtir uar leh zual turin a chah bawk a ni.

Thusawitu dang Education Minister Pu H. Rohluna chuan Educational Complex sakna tur atana hma a laksakna a vang leh an Department a duhsakna avangin Chief Minister chungah lawmthu a sawi a, Educational Complex sa tu te nen pawh an inkawm tawh thu leh a quality tichhe si lova a rang thei ang bera sa zo tura a ngen thu sawiin Mizorama zirna kalphung siamtha tura Sawrkar hmalakna chi hrang hrangah te mipuite tawiawmna an hmuh that thin avangin Mizoram mipuite hnenah lawmthu a sawi bawk a ni.

Pu Joseph Lalhimpuia, Parliamentary Secretary pawhin thusawiin Chief Minister thahnemngaihna leh Education Minister thawhrimna leh Department official te taimakna azarah hmuh theihin Education Department in hma a sawn a ni a tia , zirna tihhmasawnna tura Mizoram Sawrkar hmachhawp hrang hrangte tarlangin a bik takin zirlaibu piah lamah faina kawngah leh infiamna (sports) tihhmasawn kawngah nasa lehzuala tan la tura ruahmanna an siam thu te, Hostel Rules mumal tak siam anih thu leh peihfel tep anih thu te a sawi bawk a ni.

Serchhip Educational Complex sakna tur hi Special Central Assistance (2014-15) hnuaia hmuh niin Rs. nuai 122 seng a sak tur a ni a, chhawng li a sang a sak tur niin DEO's Office, SDEO's Office, CEO's Office te a awm tel nghal dawn a, hei bakah hian Record Room, Store Room, Computer Room etc. a awm bawk ang. Kum 2 chhung sak tur niin a sa tur hian "Lushai Engineers" thlan an ni.

Vawiin inkhawm hi Pu P.Lalchhuanga, IAS, Secretary, School Education Department in a kaihruai a, Pu K. Lalthawmmawia, IAS, Director, School Education Department in project report a pe a, he hunah hian Serchhip District Bawrhsap Dr. Lalrozama, IAS, Serchhip District SP Pu Lalringdika, MPS bakah Serchhip a Sawrkar Department hotute, khawtlang hruaitute, thuthar thehdarhtute leh zirtirtute an tel a ni.