Vawiin khan State Vector Borne Diseases Control Programme (SVBDCP) chuan a vawikhatna atan Anti Dengue Month,I&PR Auditorium ah a hmang. He function ah hian Pu Lalrinliana Sailo, Minister Health &Family Welfare chu Khuallian niin Aizawl Municipal Councillor te, tlawmngai pawl leh kohhran pawl hrang hrang te an tel.

Pu Lalrinliana chuan Mizoram ah he natna vei hi la hmuhchhuah ve ni rih lo mahse, tunlai khawvel changkanna leh hmasawn zelna avangin he natna Dengue hi kan ram ah alo awm ve theih reng avangin, lo inven lawkna atan leh he natna lak ata engtinnge kan lo inven theih ang tih te zirchiang a bul tanna atan Dengue natna do thla, a vawikhatna atan hman alo ni ve ta hi lawmawm atih thu a sawi a, he natna hi thosi atanga kai chi natna anih avangin Thosi pian theihna reng reng kan siam loh a, kan in seh tir loh bawk chuan he natna lak atang hian kan him thei a, kan awmna leh a chhehvel te vawn fai hi mitin in kan mawhphurna a ni tih hria a tan kan lak lehzual a ngai a ni a ti.

Minister chuan Mizorama kan inenkawlna chungchang sawi zelin phai lama pawisa tam tak seng a kan in refer thin hi tih tlem tuma hma lak mek anih thu leh Mizoram a kan Doctor te hi a thiam tawk a, phai lama Doctor te nen thiamna in ang reng an nei a, Mizorama Doctor ten an diagnosed reng reng hi phailam ah pawh 99% in a in ang reng a, hemi avang hian Mizoram ah inenkawlna tha a awm a, hemi tihchangtlun zelna atan khawltha leh tunlai zawk a thuam that tum mek a ni a ti.

Minister chuan Mizoram in Population, Reproductive leh Family Planning programme a hnathawh that avangin 31st July, 2012 hian New Delhi ah, Tata 5th JRD Award 2011 chu India ram puma ti tha ber lawmman a dawng tur thu sawiin he award hi tehfung chi hrang hrang 13 atanga teh a, India rama ti tha ber thlan ah Mizoram chu 1-na niin, He Award hi Amartya Sen, Noble Prize pawh lo dawng tawh hnen atanga dawn tur a ni. Hetiang chawimawina dawng tur hian hnathawktute mai bakah mipuite tawiawmna tha kan dawn vang a ni tiin Minister chuan hmasawn zel tura ke kan pen lehzualna atana min fuihtu tha tak ni zel thei se a duh thu a sawi bawk.

He programme ah hian Dengue natna, a tidarhtu thosi, a lanchhuah dan leh inven dante chu Dr. F. Lallianhlira, Jt. Director (Malaria) in a sawi a. Zawhna leh chhan hun hmang a ni bawk.

Kum 2012 - 2013 atangin National Vector Borne Diseases Programme (NVBDCP), Govt. of India chuan SVBDCP Mizoramin Malaria bakah thosi atanga kai theih natna dang, Dengue leh Chikungunya programme chu enkawl tel turin a belh a. Mizoram chhung ngeiah Dengue natna la hmuhchhuah nilo mahse, a theh darhtu (vector) thosi a awm avangin natna kai midang atangin a inkaichhawn theih a ni.

India ramah fur lai leh fur zawh lamah Dengue hi a hluar thin avangin July hi Dengue Do Thla (Anti Dengue Month) ah NVBDCP chuan a puang a, fur hi thosi tam lai anih avangin Dengue Do Thla ah hian NVBDCP chuan theihtawpa sawrkar leh mipuite tang ho a, thosi laka invenna ti chak turin a ngen a ni. Vanneih thlak takin India ramah Dengue natna a tam ang hu in thi erawh an tlem thung. Dengue natna hlauhawmna chu a hrik thahna tur damdawi bik ala awm loa amaherawhchu, a enkawl danin thui takin nunna a chhanhim thei.

Dengue natna ah hian tih dam aiin inven a tha zawk a. Chuvangin a thehdarhtu thosi pianna thosi khawi hmun ami pawh tibo a, zan mutna thosilen zar leh thosi seh laka invenna entirnan, thosi hlo hman, kawr ban tlawn hak emaw a pawimawh hle.