India ram President tur thlanna vawi 14-na chu ni 19.7.2012 (Ningani) khian neih a ni dawn a; hemi chungchangah hian vawiin chawhma dar 11.00 khan Pu K. Riachho, IAS, Chief Electoral Officer (CEO) chuan Assembly Committee Room-ah chanchinbumite a kawm a; Pu H. Lalengmawia, Jt. CEO te, President thlanna a Mizoram tana Presiding Officer tura ruat Pu Ngurthanzuala leh Asst. Returning Officer tura ruat Pu Vanlalnghenga ten CEO hi an tawiawm a ni.

India President thlan turah hian mi pahnih – Pu Purno Agitok Sangma leh Pu Pranab Mukherjee te chu candidate an ni a. Inthlanna hi kum 1971 chhiarpuia mihring awm zat behchhana neih a nih dawn a, 1971 census hi kum 2026 thlenga hman tur a ni dawn nghe nghe a ni. Kum 1971 chhiarpui ang chuan Mizoram-ah mihring 332390 an awm a ni.India President thlannaah hian Mizoram MLA 40 te vote hlut zawng belhkhawm chu 320 a ni a; MLA pakhat vote hlut zawng chu 8 a ni. Hetihlai hian Lok Sabha leh Rajya Sabha MP pakhat vote hlut zawng chu 708 a ni.

19.7.2012-a India President tur thlannaah hian India rama MLA zawng zawngte vote hlut zawng belhkhawm chu 5,49,474 a ni a; MP zawng zawngte vote hlut zawng belhkhawm chu 5,49,408 a ni a; vote awm zawng zawng hlut zawng chu 10,98,882 a ni a. President atana tling tur chuan vote tla zawng zawng atanga chhuta a chanve (50%) bakah vote 1 hmuh a ngai a ni. Kum 2007-a President thlanah khan vote 9,96,422 a tla a; President atana thlan tlin Pi Pratibha Devisingh Patil chuan vote 6,36,116 a hmu a; amah khingtu Pu Bhairon Singh Sekhawat chuan vote 3,31,306 a hmu a ni. State Assembly zingah Uttar Pradesh MLA te vote hlutna a sang ber a; MLA pakhat vote hlut zawng hi 208 a ni a; Sikkim MLA te vote hlut zawng a tlem ber a, 7 a ni.

Mizoram-ah chuan India President thlanna hi Mizoram Legislative Assembly, Main Building chhawng 2-na a Committee Room-ah 19.7.2012 khian zing dar 10.00 atanga tlai dar 5.00 thleng MLA ten vote an thlak thei ang. Ballot Box leh paper-te hi 16.7.2012 khian Jt. CEO Pu H. Lalengmawia leh Pu Vanlalnghenga ARO ten Lengpui Airport an rawn thlenpui ang a, Aizawl Treasury strong-room ah dah a ni ang a; inthlan zawh tukah Parliament House, New Delhi thlenpui a ni ang.

CEO Pu K. Riachho chuan Mizoram-a electoral roll revision chu 1.1.2013 thleng neih a nih tur thu sawiin, hemi hun chhung hian electoral roll-a hming telh leh paih ngai zawng zawngte chu inchingfel turin a chah a; he electoral roll revision behchhan hian kum 2013 General Election chu neih a nih tur thu pawh a sawi bawk.