Vawiin chawhnu khan Lunglei District Boxing Association (LUDBA) leh District Education Department tangkawp buatsaih 1st Inter High School & Higher Secondary School Boxing Championship 2018 kharna inkhawm chu SAY Extention Centre, Electric Veng, Lunglei ah neih a ni. Pi C.Lalremruati, DIPRO, Lunglei chuan khuallian ni in a hmanpui.

Kharna inkhawm hi Pu K.T. Nghawra, President Lunglei District Boxing Association  kaihhruaiah hian Pi C.lalremruati chuan thu sawiin school naupang ten zirna piah lam a infiamna (Boxing) hmanga naupang talent haichhuak tura hmalatu LUDBA leh District Education department te hmalakna hi ropui a ti a. Infiammi ni tur chuan fitness a pawimawh a, chumi tur chuan ei leh in bak ah ruihhlo lak a fihlim a ngai a ni a ti. Inrintawkna leh thunnunna nei apiang ten hlawhtlinna an chang thin a, zirlaite thiamna leh an fitness a that zia enin an hma lam ah kawl a eng a, chuvangin tun mai hi duhtawk lovin rinawmna, taihmakna, insumtheihna leh inthununna nen a hma la turin a chah a ni. 

1st Lunglei District Inter High School & Higher Secondary School Championship 2018 ah hian School 15 atangin Boxer 79 tel in a pumpui ah mipa team champion te chu Govt Bazar High School ni in runner up chu Govt Leitlangpui Higher Secondary School ni in, hmeichhia ah team champion te chu D&D High School ni in runner up te chu Govt bazar High School an ni a. Most promising boxer mipa ah Malsawmtluanga, Chhimtlang Academy ni in hmeichhiah ah F.Lalruatfeli, Pukpui High School te an ni.